Украина президенти Владимир Зеленский Донбассдаги фронтга яқинда амалга оширилган сафари давомида АҚШни Украинанинг «яхши дўсти» деб атади. Бироқ, у шунингдек Россияни ушлаб туриш ва Украина шарқида юз бераётган можароларга нуқта қўйиш учун Жо Байден «янада кўпроқ иш қилиши керак» дея таъкидлади.
Владимир Зеленский бу сўзларни ушбу сафарда унга ҳамроҳ бўлган CNN телеканали мухбири Мэттью Чэнсга айтди. Можаро рўй бераётган ҳудуддаги ушбу репортаж 12 апрель куни эълон қилинди.
Украина президентининг таъкидлашича, мамлакатга курашиш учун кўпроқ қурол-яроғ, кўпроқ маблағ ва энг муҳими, Украинага Шимолий Атлантика альянсига қўшилиш учун АҚШ ёрдами керак.
«Агар [АҚШ] Украинани НАТО таркибида кўраётган бўлса, буни очиқчасига айтиши ва бажариши керак. Фақат сўзларда эмас», — деди Зеленский CNN’га.
Зеленскийнинг ушбу ташрифи 8−9 апрель кунлари бўлиб ўтди. У мудофаанинг олдинги сафларидаги позицияларга ташриф буюрди ва ҳарбийлар билан суҳбатлашиб, уларга мукофотларни топширди.
Март ойи охирида Украина қуролли кучларининг бош қўмондони генерал-полковник Руслан Хомчак Россиянинг Украина чегараси бўйлаб машғулотлар «ниқоби остида» 28 та батальон тактик гуруҳларини тўплаганини ва яна 25 та батальон тактик гуруҳларини жойлаштиришни кўзлаганини, бунинг Украина хавфсизлиги учун катта таҳдид бўлиши мумкинлигини таъкидлади.
Шунингдек, ижтимоий тармоқларда Россия ҳарбий техникаларининг Кримда тайёргарлик кўраётгани тасвирланган видео пайдо бўлди.
Россия эса ҳарбий техниканинг Кримда синовдан ўтказилаётганини ҳарбий машғулотлар доирасида деб атади.
11 апрель куни АҚШ давлат котиби Энтони Блинкен Россиянинг ҳатти-ҳаракатларини «ҳақиқий ташвишлантирувчи» вазият деди. «Россия бундан буёғига ҳам агрессив ҳаракат қилишни давом эттирмоқчими? Агар шундай бўладиган бўлса, президент [Жо Байден] бунинг оқибатлари қандай бўлишини аниқ айтиб ўтди», — деди у.
CNN аввалроқ маълум қилганидек, АҚШ Украинани қўллаб-қувватлаш мақсадида яқин бир неча ҳафта ичида Қора денгизга ҳарбий кемаларини юбориш имкониятларини ўрганмоқда.
