Жиззахда чиқинди йиғиш транспортининг газ баллони портлаши оқибатида 2 нафар фуқаро жароҳатланди. Бу ҳақда ИИВ ЙҲХББ матбуот хизмати хабар бермоқда.
13 апрель куни соат 7:40 атрофида Жиззах шаҳрининг Мустақиллик кўчасида «Тоза ҳудуд ДУК»га тегишли чиқинди йиғиш махсус транспорт воситасида ўрнатилган газ баллон портлаб кетди.
Оқибатда шу кўчада бўлган Cobalt русумли, кўчанинг иккинчи томонида турган Nexia-1 русумли ҳамда Spark русумли автомашиналарга жиддий зарар етган. Шунингдек, пиёдалар йўлагидан ўтаётган икки нафар пиёда оғир тан жароҳатлари олиб, шифохонага юборилган.
«Соат 6 ларда бориб, газ қуйиш шаҳобчасидан 27 метр куб газ солдим. Ишга кетаётганимда, йўлда тўхтасам тўсатдан портлаб кетди. Орқадан машина урибдими, деб ўйлабман. Олдинги ойналар сочилиб кетди», — дейди газ баллони портлаган автомашина ҳайдовчиси.
Ҳозирда ҳолат юзасидан суриштирув ҳаракатлари олиб борилмоқда.
