11 апрель куни Қирғизистонда конституцияга ўзгартиришлар киритиш бўйича референдум бўлиб ўтди. Референдумда овоз берувчиларнинг 79,3 фоизи президентнинг ваколатларини кенгайтирувчи конституциянинг янги таҳририни қўллаб-қувватлашди, 13,6% қатнашувчилар эса қарши овоз беришди, дея хабар берди Қирғизистон марказий сайлов комиссияси.
Аҳолининг референдумда қатнашиш кўрсаткичи 36,9% ни ташкил этди. Қонунга кўра, референдум 30% аҳоли қатнашса ва янги конституцияни қабул қилиш учун 50 фоиздан кўп қатнашчи овоз берса, у қабул қилинган ҳисобланади.
Референдумнинг якуний натижалари яқин 10−15 кун ичида эълон қилинади.
Овозга қўйилган янги таҳрирга кўра, президент қонунчилик ташаббуси ҳуқуқини қўлга киритиб, унга ижро этувчи ҳокимиятни бошқариш, шунингдек Вазирлар Маҳкамасини тарқатиб юбориш имкониятини беради.
Қирғизистон конституцияси 1993 йилда қабул қилинган бўлиб, у 10 марта ўзгартирилган. Қонституция охирги бор 2016 йилда ўзгартирилган ва унда Бош вазир ва парламент ваколатлари кучайтирилган.
