Буюк Британия қироличаси Елизавета II нинг турмуш ўртоғи шаҳзода Филип, Эдинбург герцоги 9 апрель куни эрталаб оламдан ўтди. Бу ҳақда Қироллик оиласининг Twitter саҳифаси хабар берди.

Шаҳзода Филип 99 ёшда бўлган.

2011 йил июнь ойида туғилган кунининг 90 йиллигини нишонлаш пайтида шаҳзода Филип жамоат бошқарувидаги вазифаларини қисқартириш ниятида эканлигини эълон қилган. Букингем саройи 2017 йил 4 майда Эдинбург герцоги куздан бошлаб қирол оиласи аъзоси сифатида шахсан ўзига ишониб топширилган давлат вазифаларини бажаришни тўхтатишини маълум қилган. Шу билан бирга, шаҳзода кўплаб жамоат тадбирларида турмуш ўтроғига ҳамроҳлик қилишни давом эттирган.

Икки йил муқаддам Филип автоҳалокатга учраган, унинг автоулови бошқа машина билан тўқнашувдан ағдарилиб кетган. Бошқа автомашинадаги икки киши энгил тан жароҳати олган. Ҳодисада жароҳат олмаган Эдинбург герцоги 23 январь куни автоҳалокат учун расмий равишда узр сўраган.