Метро ҳозирда энг қулай, тезюрар ва хавфсиз транспорт туридир. Бироқ ушбу «хавфсиз» транспортда йўл қўйиладиган кичик хатолик ҳам катта ҳалокатларга олиб келиши мумкин. Дунёни ларзага келтирган метродаги 5 та йирик авариялар ҳақида қисқача маълумотлар.
Париж (Франция)
1903 йил 10 августда метро машинисти «Менилмонтан» ва «Куронне» станциялари ўртасида бўш поездни бошқариб кетаётган бўлган. Унинг вагонларидан бирида ёнғин юзага келади. У ерда одамлар йўқ эди, локомотив муваффақиятли ажратилиб, ҳалокатни четлаб ўтиш мумкин эди. Аммо тутун шу қадар кучли эдики, кейинги поезд ҳайдовчиси ёнаётган вагонни кўрмай, унга катта тезликда урилиб кетган.
Фото: livejournal.com
Одамларнинг бир қисми бир зумда ҳалок бўлган. Баъзилари эртаси куни ис газидан заҳарланиб аста-секин вафот эта бошлаган, чунки олов манбаига ўтишнинг иложи йўқ эди. Жабрланганларга ёрдам бериш учун ўт ўчирувчилар туннелни портлатишларига тўғри келган. Бироқ, жуда кеч бўлган эди. Қутқарувчилар етиб келганида 84 киши вафот этган бўлган.
Валенсия (Испания)
2006 йил ёзида Валенсия метросида тўртта вагонли поезд ҳалокатга учраган. Тергов маълумотларига кўра, бурилишга киришда поезд ҳайдовчиси рухсат этилган тезликни ошириб юборган ва биринчи вагоннинг ғилдиракларидан бири юкга бардош беролмай синиб кетган.
Фото: elvalenciano.es
Воқеа натижасида поезд ағдарилиб кетган. Фожеа 41 кишининг ўлимига олиб келди, ўнлаб йўловчилар жароҳат олишди.
Ҳалокатнинг сабаби сифатида туннель деворининг қулаши тахмини ҳам кўриб чиқилган. Валенсия ҳукумати вакили ҳам, шаҳар мэри ҳам ҳодисани «тасодифий» деб аташган. Бироқ, касаба уюшмаси расмийларни «шошқалоқлик»да айблаб, мазкур метро линияси техник жиҳатдан ёмонлашиб бораётгани тан олинмаганлигини таъкидлаган.
Боку (Озарбайжон)
1995 йилда рўй берган ушбу фожеа дунё метролари тарихидаги энг катта авариялардан бирига айланди: 286 йўловчи вафот этди (улардан 126 нафари аёл ва 28 нафари болалар). Бунга тиғиз пайтда вагонлардан бирида двигателнинг ёниши сабаб бўлган. Аммо ҳалокатнинг асосий сабабчиси эскирган ускуналар эмас, инсон бўлганлиги айтилади.
Машинист катта хатога йўл қўйган дейилади. У поездни энг яқин «Нариманов» бекатига тортиш ўрнига, уни туннелда тўхтатиб, воқеа содир бўлганлиги тўғрисида хабар беради ва контакт релсини ўчиришни талаб қилади. Йўловчиларда ваҳима бошланган, вагонлар ёнаверган. Одамлар тутун билан тўлиб кетган вагондан туннелга чиқиш учун дераза ва эшикларни синдирганлар. Ҳалок бўлганларнинг аксарияти тиқилинчда ҳаво етишмаслигидан ва вагон чарм қопламасининг ёнишидан чиқаётган заҳарли тутундан бўғилишган. Ташқарида эса ҳақиқий газ камераси бўлган ва кўриш қобилияти пастлиги сабабли қурбонлар йўналишни топа олмаганлар. Баъзиларни туннелдан чиқмоқчи бўлганида электр токи уриб ўлдирган. Уч нафар қутқарувчи ҳам вафот этган.
Фото: xeberlent.az
Ёниш ҳарорати шунчалик юқори эдики, поезд ғилдираклари рельсларга пайвандланиб қолган. 400 га яқин одам эвакуация қилинган. Уларнинг 270 нафари жароҳат олган.
Москва (Россия)
2014 йил 15 июль куни эрталаб «Парк Победы» ва «Славянский Бульвар» бекатлари орасидаги ҳудудда тўсатдан тормозланиш сабабли учта вагон рельсдан чиқиб кетган. Маълумотларга кўра, фавқулодда вазият кучланишнинг бирдан пасайиши ва ёлғон сигнал туфайли содир бўлган. Авария натижасида 20 дан ортиқ киши ҳалок бўлди ва 100 дан ортиқ киши касалхонага ётқизилди. Фожиа юзасидан жиноий иш қўзғатилган.
Фото: ru.wikipedia.org
Тэгу (Жанубий Корея)
Тэгу шаҳридаги метрода ёнғин 2003 йил 18 февралда содир бўлган. Ушбу фалокат метрополитен тарихидаги энг катта воқеалардан бири ҳисобланади. Ёнғин натижасида 198 киши ҳалок бўлган ва 147 киши жароҳат олган. Ёнғин 56 ёшли собиқ такси ҳайдовчиси, руҳий касал Ким Дэханнинг ўт қўйишидан келиб чиққан.
Фото:sohu.com
