Европа дори воситалари бўйича агентлиги коронавирусга қарши AstraZeneca вакцинаси ва вакцинани қабул қилганлар орасида кузатилган тромбоз ҳолатлари орасида боғлиқлик борлиги ҳақидаги маълумотларни тасдиқлади, дея хабар берди РИА Новости.
Шунингдек, агентлик ушбу ҳолатларни вакцинанинг жуда камдан-кам учрайдиган акс (ён) таъсири деб атамоқда. Таъкидланишича, вакцинанинг фойдаси ва зарари ўртасида тафовут келтирилганда, умумий ҳолатда вакцина ижобий деб баҳоланмоқда.
Вакцинанинг соғлиққа зарарини ўрганиш ва эмлаш стратегияси бўлими раҳбари Марко Кавалерининг айтишича, вакцинанинг нега бундай таъсир қилганлигининг сабаби маълум эмас. Ҳозирча бу борада изланишлар ҳали давом этмоқда.
Эслатиб ўтамиз, март ойи бошида Европанинг бир қатор мамлакатлари AstraZeneca вакцинасини қўллашни тўхтатиб қўйган эди. Бироқ, маълум муддат ўтиб Европа Иттифоқи кузатилаётган ҳолатлар ва ушбу вакцина ўртасида боғлиқликлар йўқ дея изоҳ бергач, бир қатор Европа мамлакатлари, жумладан Франция, Италия ва Германия AstraZeneca вакцинасини қўллашни қайтадан тиклаганди.
17 март куни эса Тошкентга 660 минг доза AstraZeneca вакцинаси олиб келинган эди.
Ҳозирда дунё бўйлаб ушбу вакцинадан 77 мамлакат фойдаланмоқда, бироқ Швеция, Норвегия, Дания, Финляндия, Ирландия ҳамда Исландия каби мамлакатлар қўллашни тўхтатган. Шунингдек, 3 та мамлакат (Канада, Франция, Нидерландия) AstraZeneca вакцинасини фақат айрим гуруҳларга нисбатан қўлламасликка қарор қилган.
Шунингдек, март ойи охирида AstraZeneca вакцинасининг номи Vaxzevria деб ўзгартирилган эди.
