Тошкент вилоятида қизил чироққа ўтиб кетганлиги сабабли тўхтатилиб, ҳужжатлари сўралган ҳайдовчининг ЙПҲ ходимига нисбатан қилмоқчи бўлган ҳужуми учун 15 суткага қамалди. Бу ҳақда ЙҲХББ матбуот хизмати хабар бермоқда.
Маълум бўлишича, 31 март куни Йўл патруль хизмати инспектори Тошкент-Чимён автомобиль йўлида светофорнинг тақиқловчи қизил чироғига бўйсунмай ҳаракатланиб келган юк автомашинасини тўхтатади. Ҳайдовчи (1988 й.т.) А.С.га қоидабузарлигини тушунтириб, ундан ҳужжатларини сўрайди.
Аммо ҳайдовчи ҳужжатларини беришдан бош тортади. Узоқ тортишувлардан сўнг, ҳайдовчи инспекторнинг қонуний талабига бўйсунмасдан, автомобилни ҳайдаб кетиб қолади.
Хабарга кўра, инспектор алоқа воситаси орқали кейинги чорраҳада турган бошқа инспектордан уни тўхтатишни сўрайди ва ўзи ҳам ўша ерга етиб боради. Аммо ҳайдовчи у ерда ҳам ҳужжатларини бермасдан анча вақт инспектор билан тортишиб туради ва инспекторни уяли телефонига тасвирга олади.
Шундан сўнг, инспектор икки нафар ҳолис иштирокида ундан яна ҳужжатларни сўрайди. Ҳайдовчи анча вақт қаршилик кўрсатиб, сўнгра ҳужжатларини беради. Унга нисбатан белгиланган тартибда электрон маъмурий баённома расмийлаштирилади.
Ҳайдовчи қоидабузарликка нисбатан қонуний чора кўрилганлиги учун, бироз муддат ўтиб қўлида тош билан инспекторнинг олдига қайтиб келади. У билан талашиб, ҳақоратлаб, сўкиниб унга ҳужум қилмоқчи бўлган ҳаракатлар содир этган ҳолда норозичилигини билдиради.
Қибрай туман ИИБ томонидан мазкур фуқаронинг ҳужжатлари расмийлаштирилиб, кўриб чиқиш учун туман судига юборилди. Суд томонидан А.С. Маъмурий жавобгарлик тўғрисидаги кодекснинг 183 моддаси (майда безорилик) ва 194 моддасига (ички ишлар органлари ходимининг қонуний талабларини бажармаслик) асосан 15 сутка маъмурий қамоқ жазоси белгиланди.
