Миср Сувайш канали учун 1 млрд доллар товон тўланишини талаб килмокда
Миср Ever Given юк кемаси туфайли Сувайш каналининг деярли бир ҳафталик фаолияти тўхтаб қолгани учун 1 млрд доллардан зиёд товон талаб қилмоқда. «Бу мамлакатнинг ҳуқуқидир», деди Сувайш канали маъмурияти раҳбари Усама Рабиа. «Биз муносиб миқдорни сўраймиз. Биз кемани катта зарар ва зиёнсиз қутқардик», дея қўшимча қилди у. 1 млрд ичига кемани саёзликдан чиқариш учун асбоб-ускуна, машина, шунингдек, 800 та қутқарувчининг харажатлари киради. Товонни ким тўлаши кераклиги аниқ кўрсатилмади, аммо зарар масаласи судга етказилса, контейнер кемаси ва унинг юклари Мисрдан чиқиб кетишига йўл қўйилмаслиги ҳақида огоҳлантирилди. AP’нинг таъкидлашича, бу жараён мураккаблашиши мумкин, чунки Ever Given Япония компаниясига тегишли бўлиб, тайванлик юк ташувчига хизмат қилади ва Панама байроғи остида юради. РИА Новости’нинг ёзишича, Ever Given кемасининг эгаси Сувайш каналини тўсиб қўйганлиги учун пул тўлашга рози бўлган. Бу ҳақда Миср президентининг денгиз портлари ва Сувайш каналини ривожлантириш бўйича маслаҳатчиси, адмирал Моҳаб Мамиш нашрга маълум қилди. «Йўқ, вазият суд жараёнига етиб бормайди, кеманинг эгаси тинчлик келишувига эришиш орқали товон тўламоқчи», дея келтиради нашр унинг сўзларини. — Associated Press.
Ҳозирда, Сувайш канали орқали ўтиши учун навбатда турган кемалар сони 206 тага қисқарди, дейилади Leth Agencies хабарида. Компания маълумотларига кўра, канал очилганидан буён ҳар икки йўналишда 357 та кема ўтган.
23 март куни Evergreen компаниясига тегишли «Ever Given» кемаси 3,5 млрдлик юк билан Сувайш каналида саёзга ўтириб қолган эди. 29 март куни кема сув юзасига чиқарилди. Bloomberg Сувайш каналининг бир соатлик ишламай қолиши глобал савдо учун 400 млн доллар, кунига 9,6 млрд долларлик йўқотишларга олиб келиши ҳақида ёзган эди.
Мьянмадаги намойишлар пайтида юзлаб одамлар ғойиб бўлди
Мьянма шаҳарларида ҳарбий ҳукуматга қарши намойишлар бошланганидан бери юзлаб одамлар ғойиб бўлди, дея хабар берди Human Rights Watch (HRW) инсон ҳуқуқлари ташкилоти. Ҳуқуқ ҳимоячиларининг фикрига кўра, бу расмийлар томонидан уюштирилган. Хавфсизлик кучлари, одатда фуқаролик кийимида одамларни уйларидан ва иш жойларидан олиб кетишади ва ҳибсга олинганларнинг қаердалиги ҳақида қариндошларига айтишдан бош тортишади. Ҳокимиятнинг бундай ҳаракатлари халқаро конвенцияларга зиддир, дея ёзади ташкилот. Ғойиб бўлганлар орасида сиёсатчилар, расмийлар, журналистлар, фаоллар ва намойишчилар борлиги айтилмоқда. Йўқолганларнинг камида 16 оиласи HRW’га қариндошлари ҳақида маълумот беришди. Таъкидланишича, ташкилотда 2,5 мингдан зиёд ҳибсга олинган шахслар ҳақида маълумот мавжуд. — HRW.
Венгрия, Польша бош вазирлари ва Италиянинг собиқ ички ишлар вазири ўнг кучлар иттифоқи тўғрисида келишиб олдилар
Венгрия бош вазири Виктор Орбан, Польша бош вазири Матеуш Моравецкий ва Италиянинг собиқ ички ишлар вазири, «Лига» партияси раҳбари Маттео Сальвини Будапештдаги йиғилишда умумевропалик ўнг қанот сиёсий бирлашмасини тузиш устида ишлашга келишиб олишди. «Биз ҳужум қилиш ёки йўқ қилиш учун эмас, балки бардошли нарсаларни қуриш учун йиғилдик. Бу кун тарихга киради», деди Сальвини. «Биз Европа Иттифоқининг етакчисига айланмоқчимиз. Бу ерда 100 млндан ортиқ аҳолиси бўлган уч мамлакат раҳбариятининг вакиллари тўпландилар. Биз ушбу режани муҳокама қилдик, амалга ошириш бугун бошланади», дея қўшимча қилди у. Унинг сўзларига кўра, ташаббуснинг мақсади «Европа Иттифоқи яратилган пойдеворларни шубҳа остига қўядиган чап кучларга муқобил бўлиш учун асос яратиш… Биз тўртинчи ёки иккинчи сиёсий куч бўлишни хоҳламаймиз. Биз Европада биринчи бўлишимиз керак». Март ойининг бошларида Венгрия бош вазири ўнг қанот кучларининг янги бутун Европа альянсини тузишни таклиф қилди. «Европада бизнинг турдаги одамлар учун, яъни оила институтини ҳимоя қилишни, ватанимизни ҳимоя қилишни истаган ва кўпроқ биргаликда ишлайдиганлар учун сиёсий паноҳ бўлиши керак», деди Орбан. Шунингдек, у Европа Иттифоқи муҳожирларга, «мултикультурализм»га, ЛГБТ жамоатчилигига қарши бўлган, христиан қадриятларини тарғиб қилувчи ва айрим мамлакатларнинг суверенитетини ҳурмат қиладиган тартибни яратишга чақирди. — Интерфакс.
Буюк Британияда AstraZeneca вакцинасидан кейин тромбознинг 30 та ҳолати аниқланди
Буюк Британиянинг Дори воситалари ва тиббиёт буюмларини тартибга солиш агентлиги AstraZeneca коронавирус вакцинаси билан эмланганидан сўнг беморларда тромбознинг 30 та ҳолатини аниқлаганлигини маълум қилди. Мамлакатда жами вакцинанинг 18,1 миллион дозаси қўлланилгани айтилмоқда. Шу билан бирга, агентлик BioNTech ва Pfizer томонидан ишлаб чиқарилган вакцинадан фойдалангандан кейин бундай хабарларни олмаганлигини айтди. — Интерфакс.
