29 март куни Венгрия бош вазири Виктор Орбан расмий ташриф билан Ўзбекистонга келди. Ислом Каримов номидаги Тошкент халқаро аэропортида олий мартабали меҳмон ва унинг рафиқасини Ўзбекистон бош вазири Абдулла Арипов кутиб олди. Бу ҳақда ЎзА хабар бермоқда.

Қисқа суҳбатдан сўнг Венгрия делегацияси пойтахтдаги Мустақиллик майдонига йўл олди. Венгрия бош вазири мамлакатга илк расмий ташрифини Мустақиллик майдонидан бошлади.

Олий мартабали меҳмон ҳуррият, порлоқ истиқбол ва эзгу ниятлар рамзи бўлган Мустақиллик ва эзгулик монументи пойига гул қўйди.

ЎзА.

Меҳмонларга Мустақиллик майдоннинг мазмун-моҳияти, бу ерда амалга оширилган бунёдкорлик ишлари ҳақида сўзлаб берилди. Виктор Орбан бу мажмуа ўзбек халқини истиқлол руҳидан куч олиб, янада улкан марралар сари интилишида ўзига хос маёқ бўлиб хизмат қилаётганини таъкидлади, дейилади хабарда.

Шундан сўнг, Венгрия делегацияси ўзи учун ажратилган қароргоҳга йўл олди.

Олий мақомдаги учрашувлар чоғида иқтисодиёт, энергетика, таълим ва кадрлар тайёрлаш, маданият, ҳудудлараро ҳамкорлик, бандлик ва меҳнат муносабатлари соҳаларида 10 дан ортиқ келишувлар имзоланиши кутилмоқда. Қолаверса, Виктор Орбаннинг илмий тадқиқот ва тарихий объектлар билан танишиши ҳам режа қилинган.

Икки давлат етакчилари ўртасидаги расмий учрашувлар 30 март кунига белгиланган.