Президент Шавкат Мирзиёев жамоат хавфсизлигини таъминлаш ва жиноятчиликка қарши курашиш соҳасида ички ишлар органлари фаолиятини сифат жиҳатидан янги босқичга кўтариш чора-тадбирлари тўғрисидаги фармонни имзолади, хабар берди Адлия вазирлиги матбуот хизмати.

Фармонга асосан, ҳар бир маҳалла, оила ва шахс кесимида ҳуқуқбузарликларнинг олдини олиш ва жиноятчиликка қарши курашишга оид муаммолар бевосита жойларнинг ўзида ҳал этилади. Ички ишлар органларининг таянч пунктлари негизида маҳалла ҳуқуқ-тартибот масканлари ташкил этилади.

Дастлаб маҳалла ҳуқуқ-тартибот масканлари Тошкент шаҳрида намунавий тарзда ташкил этилади.

Мисол сифатида пойтахтда ҳуқуқий тартиботнинг намунали пунктлари ташкил этилади, деди Тошкент шаҳар ИИБ бошлиғи Азиз Тошпўлатов «Ахборот 24» дастурига. У ерда нафақат профилактика инспекторлари, балки терговчилар, тезкор ходимлар, патруль хизмати ходимлари ва Миллий гвардия ходимлари ҳам ишлайди.

2021 йил 1 июнгача Тошкент ва Самарқанд вилоятларида профилактика инспекторига масофадан туриб мурожаат юбориш ва уни кўриб чиқиш жараёнини кузатиб бориш имконини берувчи «Smart маҳалла» ахборот дастури ишга туширилади. Дастур 2021 йил якунигача республиканинг бошқа ҳудудларида ишга туширилади.

Фармонга кўра, Ички ишлар вазирлиги тузилмасида қуйидагилар ташкил этилди:

  • Жиноят қидирув бош бошқармаси, Терроризм ва экстремизмга қарши курашиш бош бошқармаси, Тезкор-қидирув ҳамкорлиги бошқармасини ўз ичига оладиган Тезкор-қидирув департаменти;
  • Патруль-пост хизмати ва жамоат тартибини сақлаш бош бошқармаси, Ҳуқуқбузарликлар профилактикаси бош бошқармаси, Йўл ҳаракати хавфсизлиги бош бошқармаси, Пробация хизматини ўз ичига оладиган Жамоат хавфсизлиги департаменти;
  • Транспортда хавфсизликни таъминлаш бош бошқармаси,
    Хавфсиз туризмни таъминлашни мувофиқлаштириш бошқармасини ўз ичига оладиган Транспорт ва туризм объектларида хавфсизликни таъминлаш департаменти;
  • Кадрлар бош бошқармаси, Маънавий-маърифий ишлар бошқармаси, касбий тайёргарлик бошқармасини ўз ичига оладиган Маънавий-маърифий ишлар ва кадрлар билан таъминлаш департаменти;
  • Ҳуқуқий статистика ва тезкор-ҳисоб маълумотлар маркази (Бош прокуратуранинг Жиноий-ҳуқуқий статистика бошқармаси ва унинг ҳудудий бўлинмалари тугатилди);
  • Жамоат хавфсизлиги масалалари илмий-амалий тадқиқотлар маркази.

Бундан ташқари, Жазони ижро этиш бош бошқармаси Ички ишлар вазирлиги ҳузуридаги Жазони ижро этиш департаменти этиб қайта ташкил этилди. Ҳудудий ички ишлар органларининг тузилмасида ички ишлар органлари бошлиқларининг жамоат тартибини сақлаш бўйича, пробация ва жазони ижро этиш масалалари бўйича ўринбосари, ҳуқуқбузарликлар профилактикаси бошқармаси (бўлими) бошлиғи лавозимлари тугатилди.

Эслатиб ўтамиз, президент Тошкент шаҳар ИИБга ташриф буюрганида, ички ишлар бошқармалари одамлар билан боғланиб, онлайн мулоқот қила оладиган дастурий таъминот яратиш кераклигини таъкидлаган эди.