Жанубий Корея раҳбари давлат ходимлари билан боғлиқ коррупция можароси учун узр сўради
Корея Республикаси президенти Мун Чжэ Ин давлатга тегишли ер ва уй-жой корпорацияси ходимлари иштирок этган ер спекуляцияси можароси учун мамлакат фуқароларидан узр сўради. Мамлакат раҳбари 16 март куни ҳукуматнинг ҳафталик йиғилишини очиб, тегишли баёнотларни берди. «Ушбу жанжал бошланганидан жуда афсусдаман, бу одамлар орасида ҳасрат ва умидсизликни кучайтирди», деди Мун Чжэ Ин. Шу муносабат билан у давлат хизматчилари орасида коррупцияга қарши курашни кучайтиришга ваъда берди. «Кўчмас мулк билан боғлиқ бўлган чуқур илдиз отган „ёвузликни“ олиб ташлаш янада адолатли жамият қуриш йўлидаги бурилиш нуқтаси бўлади», деди президент. Шунингдек, у давлат хизматчиларининг ахлоқий меъёрларини оширишдан бошлаб, давлат муассасаларида туб ислоҳотларни амалга ошириш зарурлигига ишора қилди. Aввалроқ маълум бўлганидек, миллий ер ва уй-жой корпорациясининг камида йигирма ходими катта қурилишлар режалаштирилганлиги тўғрисида расмий маълумотларга эга бўлган ҳолда пойтахт ҳудудида ўзлаштирилмаган ер участкаларини сотиб олишди. Сўнгги йилларда мамлакатнинг барча ҳудудларида уй-жой нархи ва ижара ҳақи кескин кўтарилиб кетганлиги можарони янада кучайтирди. — ТАСС.
Хитой ҳукумати Alibaba’дан медиа активлар портфелини қисқартиришни талаб қилди
Хитой ҳукумати мамлакатдаги энг йирик интернет-компанияси бўлмиш Alibaba’дан унинг медиа активлари ҳажмини қисқартириш талабини қўйди, деб ёзади The Wall Street Journal. Alibaba активларини кўриб чиқаётган хитойлик регуляторлар компаниянинг медиа-бизнесдаги манфаатлари қанчалик кенглигидан ҳайратда қолишиб, ундан ушбу соҳадаги активларни сезиларли даражада қисқартириш режасини тақдим этишни талаб қилишди, дейди манбалар. Жек Ма томонидан асос солинган Alibaba йиллар давомида босма, рақамли ОАВ ва ижтимоий тармоқларни ўз ичига олган медиа активлари портфелини яратди. Хусусан, компания Twitter’нинг хитойча варианти бўлган Weibo’нинг, шунингдек, масалан, Гонконгда инглиз тилида нашр этиладиган South China Morning Post’нинг улушига эгалик қилади. Нашрнинг ҳисоб-китобларига кўра, Alibaba акцияларининг компаниялардаги умумий қиймати 8 мрлд доллардан ошади, хусусан, Weibo Corp. 3,5 млрд доллар ва Bilibili Inc. видео платформасидаги улуши 2,6 млрд долларга баҳоланмоқда. — The Wall Street Journal.
Financial Times’нинг ёзишича, Alibaba браузери хитой илова дўконларидан олиб ташланди.
Бразилияда пандемия бошланганидан бери соғлиқни сақлаш вазири тўртинчи марта алмашти
Бразилия президенти Жаир Болсонару 15 март куни Бразилия кардиология жамиятининг президенти доктор Марсело Кейрога генерал Эдуардо Пазуэлл ўрнига соғлиқни сақлаш вазири этиб тайинланишини маълум қилди. «Бугун тушдан кейин Марcела Кейрогани тайинлаш тўғрисида қарор қабул қилинди. Мен уни бир неча йилдан бери танийман. (…) У Пазуэллнинг қилган ишларини давом эттириб, яхши ишлаши учун керак бўлган ҳамма нарсага эга», деди Болсонару. Бразилия президентининг сўзларига кўра, Кейрога ўзининг ишчи жамоасини танлаб, «бир-икки ҳафта ичида» ишга киришади. Кейрога COVID-19 пандемияси бошланганидан бери Бразилияда тайинланган тўртинчи соғлиқни сақлаш вазири бўлади. Ҳозирда мамлакатда оғир вазият кузатилаяпти. 16 март ҳолатига кўра, у ерда пандемия давомида жаъми 11,5 млндан ортиқ одам коронавирус билан касалланган, жами деярли 280 минг киши вафот этган. Мамлакат шифохоналари тўла, Бразилиянинг 26 штатидан 22 тасида интенсив терапия бўлимлари тўлишга яқин турибди. — Интерфакс.
Киев Қримни деоккупация қилиш стратегиясини тайёрлади — Зеленский
Қримнинг Россияга қўшилиши бўйича референдумнинг бир йиллиги муносабати билан Украина президенти Владимир Зеленский Киев ярим оролни тарк этмаслигини ва «яриморолни деоккупация (истилога чек қўйиш) қилиш ва қайта интеграциялаш стратегияси» тайёрлаганини маълум қилди. «Етти йил олдин Россия Қримда сохта референдум ўтказди. Ноқонуний аннексиядан сўнг Украина биринчи марта яриморолни деоккупация ва қайта интеграциялаш стратегиясини тайёрлади», — деб ёзган Зеленский ўз Twitter'ида. Киев Қримни қайтариш масаласини муҳокама қилишни режалаштирган «Қрим платформаси» саммити 23 август куни, Украина мустақиллиги куни арафасида ўтказилиши режалаштирилган. Украина томони ушбу платформага Туркия, Франция, Буюк Британия, Германия, Канада ва AҚШ каби қатор давлатларга қўшилишни таклиф қилди. — РИА Новости.
Маҳаллий америкалик аёл илк бор AҚШ ички ишлар идорасига раҳбарлик қилади
15 март куни AҚШ Сенати Дебра Хааланднинг Ички ишлар вазирлиги раҳбари лавозимига номзодини маъқуллаш учун овоз берди. Овоз бериш натижаларига кўра, 51 сенатор Хааландни ёқлаб, 40 нафари эса унга қарши овоз берди. 60 ёшли Хааланд Нью-Мексико штатининг ғарбий-марказида жойлашган Пуэбло ҳинду қабиласининг вакилидир. Американинг туб аҳолиси вакилининг вазир бўлиши мамлакат тарихида илк бор кузатилмоқда. — CNN.
Буюк Британия ўзининг биринчи космик стратегиясини ишлаб чиқади
2021 йил давомида Буюк Британиянинг Миллий космик кенгаши биринчи миллий космик стратегияни ишлаб чиқади, хусусан, космик қўмондонликнинг ташкил этилиши ва мамлакатдан сунъий йўлдошларни учириш имкониятларини ривожлантирш кўзда тутилган. Таъкидланишича, 2021 йилга мўлжалланган миллий космик стратегия «ҳарбий ва фуқаролик космик сиёсатига комплекс ёндашувни» бирлаштиради. Унинг бир қисми сифатида 2021 йилнинг ёзига қадар «Буюк Британия қуролли кучлари мамлакат манфаатларини ҳам Ерда, ҳам космосда илгари суриш мақсадида ривожланган имкониятларга эга бўлиши учун» янги космик қўмондонликни ташкил этиш режалаштирилмоқда. 2022 йилга қадар Буюк Британиядан (Шотландиядан) сунъий йўлдош учириш имкониятларини ривожлантириш режалаштирилган. «Бу бизга кўпроқ стратегик мухторият ва Буюк Британия космосга нима ва қачон юбориши тўғрисида мослашувчанликни беради», — дея таъкидланди ҳужжатда. — Ҳужжат.
Шунингдек, Буюк Британия ядро салоҳиятини 40 фоизга оширмоқчи. Гап «Trident» ядровий ракеталари сонини 180 тадан 260 тага етказиш режалари ҳақида кетаяпти, бу ўттиз йил давом этган босқичма-босқич қуролсизланиш жараёнининг тугаганлигини кўрсатмоқда. Шарҳда таъкидланишича, ушбу стратегия хавфсизлик муҳитидаги ўзгаришлар ва кенг кўламли технологик ва доктринавий таҳдидларнинг мавжудлиги натижасидир.
