Санитария-эпидемиологик осойишталик ва жамоат саломатлиги маркази Тошкент шаҳар бошқармаси бошлиғи Малика Қудратхўжаева Халқ депутатлари Тошкент шаҳар Кенгашининг ўттиз олтинчи сессиясида пойтахтдаги эпидемиологик вазият ҳақида хабар берди.
Унинг сўзларига кўра, «учта туманда карантин қоидаларига масъулиятсизлик билан ёндашиш касалликнинг кенг тарқалишига олиб келган». 16 мартдан бошлаб коронавирус билан касалланиш даражаси ошгани сабабли Тошкентнинг Мирзо Улуғбек, Чилонзор ва Юнусобод туманларининг барча мактабларида ўқув машғулотлари онлайн тарзда ташкил этилди.
Шу жумладан, 10 март куни Юнусобод туманида жойлашган мактабгача таълим муассасаси тарбиячиси Р. М.да коронавирус инфекцияси аниқланган. Эпидемиологик суриштирув натижасига кўра, тарбиячи хонадонида коронавирус инфекцияси билан касалланган бемор бўлишига қарамасдан, у карантин талабларига риоя этмаган ва ишлашда давом этган. 11 март куни эпидемиологик кўрсатмага асосан муассасанинг тарбиячи ва тарбияланувчиларидан коронавирус инфекциясига тест таҳлиллари олинган. 13 март куни 2 нафар тарбиячида, шифокорда ва 1 нафар тарбияланувчида коронавирус инфекцияси аниқланган. Ҳозирда бу иш Тошкент шаҳар прокуратурасининг назоратига олинган.
Бундан ташқари, 5 март куни Мирзо Улуғбек туманида жойлашган таълим муассасаси тарбиячиси М. М.нинг қайнотаси даволаш муассасасига коронавирус инфекцияси ташҳиси билан етказилган ва 7 март куни вафот этган. 9 март куни жаноза пайтида мазкур таълим муассасасининг бир неча ходимлари иштирок этган ва бу билан муассаса тарбияланувчиларининг соғлиғини хавфга қўйган.
Шу билан бирга, Соғлиқни сақлаш вазирлиги сўнгги марта 10 февралда COVID-19 дан вафот этганлик ҳолати ҳақида хабар берган эди. «Газета.uz» Соғлиқни сақлаш вазирлиги матбуот хизматидан тезкор изоҳ ололмади.
Хабарга кўра, Олмазор туманида жойлашган олий таълим муассасасига қарашли ётоқхонада ҳам 3 нафар талабада бир неча кундан буён тана ҳароратининг кўтарилиши, томоқ оғриғи ва ҳолсизлик белгилари бўлганлиги сабабли, талабалардан 11 март куни коронавирус инфекциясига тест таҳлил суртма намуналари олинган. 13 март куни тегишли факультетнинг 4 нафар талабасида COVID-19 аниқланган. Бироқ, уларда касаллик аломати мавжуд бўлмаган.
Тошкент шаҳрига коронавирус инфекцияси кириб келиши ва тарқалишининг олдини олиш бўйича Тошкент шаҳар штабининг бир қатор қарорлари қабул қилинди:
- коронавирус инфекцияси аниқланган оилаларда карантин талабларига риоя этмаган фуқароларга нисбатан қонуний жазо чоралари кўрилади;
- аҳоли орасида COVID-19 кенг тарқалишининг олдини олиш, фуқаролар саломатлигини ҳимоя қилишни янада кучайтириш мақсадида Тошкент шаҳрида бўлиб ўтадиган оммавий-маданий тадбирлар ўтказилишида карантин талабларига қатъий риоя этилиши назоратга олинади;
- спорт мусобақаларини томошабинларсиз ўтказилиши чоралари кўрилади;
- эпидемиологик вазият ёмонлашган тақдирда жорий йилнинг 1 апрелидан бошлаб оммавий тадбирларни вақтинча тўхтатиб туриш юзасидан Республика Махсус комиссиясига тегишли таклиф киритилади.
Тошкент шаҳар ҳокимлиги ҳам ўз тизимидаги мажлисларни ўтказишни вақтинча чеклаб қўйди. Зарурат туғилганда, улар онлайн тарзда ўтказилади.
Бундан ташқари, университетлар ва ётоқхоналарда карантин талабларига риоя қилиш бўйича кўрсатмалар берилди.
Аввалроқ, Тошкент шаҳридаги такси ва қурилишларда карантин чоралари кучайтирилиши бўйича қарорларэълон қилинган эди.
Сўнгги беш кун ичида пойтахтда COVID-19 билан касалланиш ҳолатлари кўпаймоқда. Шаҳар ҳокимлиги «карантинга риоя қилиш» устидан назорат кучайтирилиши ва жамоат транспортида мажбурий ниқоб кийиб юриш талаби ҳақида хабар берган эди.
