16 март куни Россиянинг Shimco Group ва Словакиянинг Chirana компаниялари Тошкент шаҳрида ўпкани сунъий вентиляция қилиш аппаратларини (ИВЛ) ишлаб чиқариш корхонасини ишга туширди, дея хабар берди «Газета.uz» мухбири.
«Chirana Asia» номи остида фаолият бошлаган Россия-Словакия-Ўзбекистон қўшма корхонаси йилига 500 та ИВЛ ишлаб чиқара олади. Ишлаб чиқаришнинг умумий миқдори 6 млн долларга тенг.
Shimco Group президенти Василий Шимко 2020 йил май ойида биринчи ИВЛ аппаратини Тошкент шаҳридаги 1-сонли Республика клиник касалхонасига топширилганлигини айтди.
Ишлаб чиқаришнинг биринчи босқичида компания ИВЛ аппаратлари ишлаб чиқариш учун 2 млн доллар сармоя киритган.
Ишлаб чиқарилаётган маҳсулотларнинг 80 фоизигача бўлган ҳажми Марказий Осиё мамлакатларига — биринчи навбатда Афғонистонга экспорт қилиниши режалаштирилган. Бундан ташқари, компания Тожикистон ва Қирғизистон билан шартномалар тузган.
Маълумот учун, 2020 йил апрель ойида Словакиянинг Chirana компанияси билан ҳамкорликда Ўзбекистонда ўпканинг сунъий вентиляцияси аппаратлари ишлаб чиқариш йўлга қўйилиши ҳақида хабар берган эдик.
