Европа ва Марказий Осиёда тенглик ва инсон ҳуқуқлари ташкилот ҳисобланмиш «ILGA Europe» ҳамда бир қанча бошқа ташкилотлар Ўзбекистон президенти ва Ҳукуматига мамлакат қонунчилигидан бесоқолбозлик (эркак билан эркакнинг жинсий алоқа қилиши)ни таъқиқловчи нормани чиқариб ташлаш тўғрисида мурожаат йўллаган эди.
Мазкур таклиф юзасидан Олий Мажлис Қонунчилик палатаси депутати Расул Кушербаев ўз муносабатини билдирди. Унинг фикрича, «демократия йўлида инсон табиатига мос бўлмаган ҳаракатларни қўллаб қувватлашдан бўлак ҳар нарсага чидаш мумкин».
«Лекин эркак билан эркакнинг ўзаро эр ва хотин сифатида турмуш кечириб, муносабат қилишларини ҳеч қачон қабул қила олмайман. Ва токи тирик эканмиз Ўзбекистонда бундай бемаъни ҳаракатга қонунан рухсат берилмаслигига ишонаман», — деди депутат.
«Расул Кушербаев бу ҳолатни мамлакат тараққиёти ва миллат генофонди учун фожиа», дея қайд этган.
«Тўғриси қайси бош билан (агар бўлса албатта) ўйлашаётганини билмадим-у, бироқ мамлакат тараққиёти ва миллат генофонди учун бу қандай фожиа эканлигини таклиф бераётган „бир жинсчи“ ташкилотлар англашаётганмикан ўзи. Тўғриси буни тасаввур қилишнинг ўзи дахшат», деб ёзади у.
«Одамлар учун фойдаси тегадиган, келажак авлод фаровонлиги учун хизмат қиладиган таклифлар тиқилиб ётганда буларнинг сўраётган нарсаси ҳеч бир қолипга сиғмайдиган иш. Агар бу инсон ҳуқуқларига зид, дейишса тупурдим бундай ҳуқуқига», — деди қуйи палата депутати.
Кушербаевнинг фикрича, миллат, халққа дўст одам, якуни авлодларнинг жисмонан йўқ бўлиши билан тугайдиган бундай мантиқсиз, аксилтабиий таклиф билан чиқмайди. «Демак уларнинг бизга асли ким экани ва мақсади нима эканлигини тушуниб олаверинг», — дея қўшимча қилган депутат.
