Туркия ва Мисрнинг дипломатик даражадаги алоқалари қайта тикланмоқда
Туркия ташқи ишлар вазири Мевлут Чавушўғли 12 март куни Aнқара ва Қоҳира ўртасида дипломатик даражадаги алоқалар тикланганини эълон қилди. «Aлоқалар кўп йиллар олдин узилган эди, шунинг учун ҳеч нарса бўлмагандек бир кунда муносабатларни тиклаш мумкин эмас. Бунинг учун кетма-кет учрашувлар, йўл харитасини белгилаш ва шундан келиб чиққан ҳолда ишлашимиз керак», деди у Anadolu билан суҳбатда. — Миср билан разведка идоралари ўртасида ва ташқи ишлар идоралари даражасида алоқаларимиз бор. Дипломатик даражадаги алоқаларни ҳам бошладик". Туркия ва Миср ўртасидаги муносабатлар 2013 йилда Миср президенти Муҳаммад Мурси ҳокимиятдан ағдарилгандан сўнг кескин ёмонлашди, шундан сўнг томонлар ўз элчиларини чақириб олишган эди. Туркия президенти Тоййип Эрдўған бундан олдин ҳам бир неча бор Миср президенти Aбдель Фаттоҳ ас-Сисини «золим» деб атаган эди. Шу билан бирга, Чавушўғли «бир неча бор Миср ташқи ишлар вазири Самеҳ Шукри билан турли халқаро майдончаларда кўришганини» таъкидлади. — Anadolu.
Япония чет элдан кунига 2 минггача одам қабул қилади
Япония ҳукумати коронавирус тарқалишига қарши курашиш доирасида чет элдан мамлакатга кирадиган одамлар сонига кунига 2 минг кишилик чеклов қўйишга қарор қилди. Бу ҳақда Токиода бўлиб ўтган матбуот анжуманида давлат ерлари, инфратузилма, транспорт ва туризм вазири Кадзуёси Акаба маълум қилди. «Карантин чораларини самарали амалга ошириш учун, — деди у, — ҳозирги кунда Японияга, шу жумладан, мамлакатимиз фуқаролари ва узоқ муддатли визалари бўлган шахслар сонига кунига 2 минг кишилик чеклов қўйилади». Вазир ушбу чора биринчи навбатда коронавируснинг янги штаммларини Японияга чет элдан кириб келишининг олдини олиш мақсадида қабул қилинганлигини таъкидлади. Унга кўра, мамлакат авиакомпанияларига хорижий давлатлардан келаётган лайнерларида йўловчилар сонини тегишли равишда чеклаш тўғрисида мурожаат қилинди. Хусусан, вазирнинг сўзларига кўра, мамлакатнинг етакчи авиакомпаниялари Japan Airlines ва All Nippon Airways чет элдан ҳафтасига 3400 дан кам одамни ташишга рози бўлишди. — ТАСС.
Баҳорда халқаро парвозларнинг тикланиши бошланади — IATA
Халқаро ҳаво қатновлари жорий йилнинг иккинчи чорагида тиклана бошлаши кутилмоқда, деди Халқаро ҳаво транспорти ассоциацияси (IATA) раҳбари Aлександр де Жюньяк. Унга кўра, чегаралар очилганидан сўнг туристик саёҳатлар сонининг кескин ўсиши кузатилади. «Биз, эҳтимол, шу йилнинг май ёки июнь ойларидан кейин ҳаво қатновидаги ўзгаришларни кўришни бошлаймиз, — деди де Жюньяк. Биз IATA’да чегараларни очиш бўйича протоколлар ва йўл хариталарини ишлаб чиқиш ва режалаштириш бўйича мамлакатлар билан ишлаяпмиз». Хусусан, у уюшма томонидан ишлаб чиқилган Travel Pass (саёҳат паспорти) мобил иловаси ҳақида айтди, унда йўловчининг вакцинация тарихи ва коронавирус инфекциясини текшириш натижаларини кўрса бўлади. IATAнинг сўнгги маълумотларига кўра, январь ойида дунёда йўловчи ҳаво ташиш ҳажми 2019 йилнинг шу ойига нисбатан 72 фоизга камайди. Халқаро юклар ташиш ҳажми эса 85,6 фоизга камайди. IATA бутун дунё бўйлаб 290 та авиакомпания билан ишлайди, бу дунёда ҳаво қатновининг тахминан 82 фоизини ташкил қилади. — Интерфакс.
Aнафилаксия AstraZeneca вакцинасининг ён таъсири рўйхатига киритилади
Европа дорилар бўйича агентлиги (ЕМA) анафилактик реакция ва юқори сезувчанликни AstraZeneca вакцинасининг ён таъсири рўйхатига киритишни тавсия қилди. Бу регуляторнинг ҳужжатида кўрсатилган. Тавсия ЕМA’нинг Фармакологик хатарларни баҳолаш қўмитаси (PRAC) ушбу препаратнинг оғир аллергик реакциялари ҳақида 41 та мурожаатни кўриб чиққанидан сўнг берилди. Ушбу ҳолатлар Буюк Британияда эмланган 5 млн кишида аниқланган. PRAC баъзи анафилаксия ҳолатлари эмлаш билан боғлиқ деган хулосага келди. AstraZeneca вакцинасининг анафилактик реакцияси потенциал хавф сифатида қайд этилган. Эмлашдан сўнг, камида 15 дақиқа давомида одамларнинг ҳолини кузатиб бориш тавсия этилади. — ЕМА.
