9 март куни Ўзбекистон ташқи ишлар вазири Абдулазиз Камилов ва Туркия ташқи ишлар вазири Мевлут Чавушўғлу учрашуви бўлиб ўтди, дея хабар бермоқда «Газета.uz» мухбири.
Аввалига, икки вазирлик раҳбарлари ўртасида тор доирада суҳбат бўлиб ўтди. Мевлут Чавушўғлу 6 мартда Ўзбекистонга келган бўлса, шундан буён «ўзбекларнинг меҳмондўстлигидан ўзини уйидагидек ҳис қилаётганини» маълум қилди ва бунинг учун миннатдорчилигини билдирди.
Тор доирадан кенгайтирилган тартибдаги ТИВ раҳбарлари бошчилигида Стратегик режалаштириш гуруҳининг иккинчи йиғилишига ўтилди.
Унда бўлажак қўшма тадбирларга, хусусан, олий даражадаги Ўзбекистон-Туркия стратегик ҳамкорлик кенгашининг иккинчи йиғилишига тайёргарликнинг ташкилий масалалари кўриб чиқилди.
Мажлисда Туркия делегацияси ўзига хос турнени амалга ошираётгани, Ўзбекистондан олдин Туркманистонда бўлишгани, бундан кейинги манзил эса Қирғизистон эканлиги айтилди.
Шундан сўнг, икки мамлакат делегациялари раҳбарлари Ўзбекистон ва Туркия ташқи ишлар вазирликлари ўртасида 2022−2023 йилларга мўлжалланган ҳамкорлик дастури ва Таржима хизматлари соҳасида ўзаро англашув меморандумини имзолашди.
Якунда ташқи ишлар вазирлари ОАВ вакиллари учун брифинг ўтказди ва ўзаро ҳамкорлик масалалари юзасидан фикр билдиришди.
Туркия президент 2021 йилда Ўзбекистонга келади
Ўзбекистон ташқи ишлар вазири Абдулазиз Камилов Туркия президентининг Ўзбекистонга расмий ташрифи шу йили амалга оширилиши таклифи билдирилганини маълум қилди.
«Музокаралар давомида олий даражадаги ўзбек-турк Стратегик ҳамкорлик кенгашининг 2-йиғилишини ўтказиш мақсадида Туркия президенти Режеп Таййип Эрдоған жаноби олийларини 2021 йилда ўзларига қулай бўлган вақтда Ўзбекистонга расмий ташриф буюриш таклифи яна бир бор билдирилди», — деди вазир.
Камилов, — «Ўзбекистон ота юртингизнинг эшиклари сизлар каби яқин қардошларимиз учун доимо очиқ», — дея сўзини якунлади.
Туркия собиқ президенти Сулаймон Демирелнинг мактуби
Ўз навбатида Туркия ташқи ишлар вазири ўз миннатдорлигини билдириб, Ўзбекистон мустақиллигини тан олган биринчи давлат Туркия бўлгани ва мамлакатда очилган илк элчихона ҳам айнан шу давлатники эканини қайд этди.
«Сал аввал, Абдулазиз акамизга ўша пайтларда бош вазир, кейинчалик президент (1993−2000 йилларда) бўлган марҳум Сулаймон Демирел мактубининг бир нусхасини тақдим этдим», — деди у.
Битимлар
Туркия вакили Олий кенгашнинг биринчи саммитида қабул қилинган қарорлар ижросининг бориши муҳокама қилинганини ҳам қайд этди.
«Олий кенгашнинг иккинчи саммитига бўладиган тайёргарликларни бугун бошлаб юбордик ва саммитга жуда ҳам зич завишда ишларни олиб борамиз. Муҳтарам президентимиз Эрдоғаннинг Ўзбекистонга ташрифида бўлиб ўтадиган олий кенгашнинг иккинчи саммити чоғида имзолашни хоҳлаган битимларимиз рўйхатини тақдим этдик. Улар устида муҳокамаларни давом эттириб, саммитда имзолаймиз», — деди Чавушўғлу.
«Ҳозирги вақтда биз имтиёзли савдо битимини имзолаш жараёнидамиз, биз уни тезроқ имзолаб олгач, кейинги босқичда эркин савдо битими муҳокамаларига ўтишни хоҳлаймиз. Иқтисодий муносабатларимизни ривожлантириш учун катта салоҳият бор, уни ҳаётга жорий қилиш учун қўлимиздан келган ишни бажарамиз», — дея қўшимча қилди вазир.
Брифинг якунида Туркия ТИВ раҳбари шу куниёқ Ўзбекистон президенти қабулида бўлиши ва кейинги манзил — Қирғизистонга йўл олиши маълум қилинди.
Маълумот ўрнида, Ўзбекистон ва Туркия ўртасида имтиёзли савдо тўғрисидаги Битимни имзолаш шартлари муҳокама қилинмоқда.
Битим президент Шавкат Мирзиёевнинг 2020 йилнинг февралида Туркияга расмий ташрифи давомида эришилган келишувларда белгиланган ва ўзаро савдо ҳажмини 5 млрд долларга оширишнинг муҳим воситаси сифатида қайд этилган. Битим билан муайян буюмларга нисбатан божхона божлари қўлланилмаслиги ёки уларнинг ставкаси сезиларли даражада пасайтирилиши режа қилинган.
