ИИВнинг «Ўзбекистон Республикаси ички ишлар органлари вақтинча сақлаш ҳибсхоналарининг ички тартиб қоидаларига ўзгартириш ва қўшимчалар киритиш тўғрисида"ги буйруғи лойиҳаси жамоатчилик муҳокамаси учун эълон қилинди.

Ҳужжатга кўра, 176-бандни қуйидагича баён этиш таклиф этилмоқда.

Суд, прокурор, ҳимоячи ёки ВСҲларни текшириш ҳуқуқига эга бўлган давлат органлари номига, шунингдек жиноят ишини юритаётган мансабдор шахсга ёки органга йўлланган ариза, таклиф ва шикоятлар цензурадан ўтказилмайди ҳамда берилган кундан кейинги иш кунидан кечиктирмай муҳрланган тарзда олувчиларга юборилади ёки топширилади, телеграммалар эса дарҳол юборилади.

Олий Мажлсининг Инсон ҳуқуқлари бўйича вакилининг (омбудсманнинг) ва Ўзбекистон Республикаси Президенти ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакилнинг номига юборилган шикоятлар муассаса маъмурияти томонидан кўздан кечирилиши мумкин эмас. Қолаверса, олувчига йигирма тўрт соатдан кечиктирмай юборилади.

Омбудсман ва бизнес омбудсманнинг жавоби муассаса маъмурияти томонидан кўздан кечирилиши мумкин эмас ва аризачига дарҳол етказиб берилади.

Амалдаги, 2019 йилда киритилган ўзгартиш ва қўшимчаларга мувофиқ, «…ВСҲларни текшириш ҳуқуқига эга бўлган бошқа давлат органлари номига, шунингдек жиноят ишини юритаётган мансабдор шахсга ёки органга йўлланган ариза, таклиф ва шикоятлар цензурадан ўтказилмайди ҳамда берилган кундан кейинги иш кунидан кечиктирмай муҳрланган тарзда олувчиларга юборилади ёки топширилади, телеграммалар эса дарҳол юборилади».

Мазкур ўзгартириш ва қўшимчалар Олий суд, Бош прокуратура, ССВ ва Адвокатлар палатаси билан келишилган.

Буйруқ лойиҳаси муҳокамаси 24 мартга қадар давом этади.