UzAuto Motors`нинг қимматбаҳо категориядаги автомобилларининг юқори нархи анзонлаштирилган «бюджетный» машиналардан келаётган йўқотишларни қоплашга қаратилган бизнес модел билан боғлиқ. Бу ҳақда сешанба куни «Ўзавтосаноат» бошқарув кенгаши раиси ўринбосари Азизбек Шукуров маълум қилди.
«Газета.uz» кузда UzAuto Motors команияси General Motors Overseas Distribution билан 2020−2021 йилларда 8750 та Chevrolet Equinox автомобилини етказиб бериш бўйича шартнома имзолагани ҳақида хабар берган эди. Шартнома суммаси қарийб 200 млн долларни, ёки ҳар бир машина учун таҳминан 22845 долларни (CIP/CPT бўйича нарх) ташкил этган. Ўзбекистонда эса Equinox 349 млн сўм (33,1 минг доллар) миқдорда сотилган.
UzAuto Motors маркетинг бўйича бошқарув директори Александр Сахапов нархлардаги тафовутга изоҳ берди.
«„22 мингдан харид қилиб, 35 мингга сотаяпмиз“ — бу бошқа мамлакатдан сотиб олиш нархи. Унда ҳали етказиб бериш, транспорт ва автомобилни тайёрлаш ҳаражатлари кўрсатилмаган. Якунда ушбу ҳаражатларни ҳисобга олган ҳолда Ўзбекистонда Equinox моделининг энг яхши конфигурацияларидан бири ҳисобланган Redline тўплами 33158 долларда нархланмоқда», — деди у.
«Газета.uz» мухбири General Motors Overseas Distribution билан тузилган шартноманинг тушунтириш хатида нарх CIP/CPT бўйича (сотувчи белгиланган манзилгача етказиб беришда транспорт ҳаражатлари ҳамда суғуртани қоплаши) кўрсатилганини таъкидлади.
«Сиз кўрганингиз, интернетга чиқиб кетган, бу мазкур шартнома тушунтириш хатининг биринчи вароғи эди. Шартноманинг ўзини сиз ўқимагансиз… 33158 доллар нархни шакллантирувчи қўшимча устама нарх мавжуд», — дея қайд этди Александр Сахапов.
Азизбек Шукуров Equinox, Traverse ва Malibu каби автомобилларни UzAuto Motors «бош импортёри»га айланди, деган хабарлар интернетда тарқалишига тўхталиб ўтди.
Унинг айтишича, компания ўтган йили 280 мингта мошина ишлаб чиқарган. Equinox, Malibu ва шу каби бошқа моделдаги автомобиллар эса бор йўғи 10 мингта сотилган.
«Нечта мошина олиб келиниб сотилди ва қанча ишлаб чиқарилди деганда, агар нисбатни олсак, қиммат машиналар 5 фоиздан ошмайди. Яъни биз маҳсулотимиз портфелида фақат 5 фоизини олиб келиб, сотаяпмиз. Қолган 95 фоизини ишлаб чиқараяпмиз», — деди у.
Азизбек Шукуров қимматбаҳо автомобиллар юқори даромадли мижозларга, ишлаб чиқарилаётган 280 минг автомобиль (Damas, Spark, Nexia, Cobalt) эса «бюджетный сегмент»га мўлжалланганини айтди.
«UzAuto Motors бизнес модели шунақа қилинганки, иложи борича оммага мослашган „бюджетный“ машиналарга жуда минимал даромад қўйилган. Конфеденциал тижорий сирни очаяпман сизларга, Spark, Nexia каби машиналарда [сотувдан] даромад умуман йўқ. Нафақат даромад, балки йўқотиш бор. Оммага кўпроқ машина етказиш имкониятини яратиш учун қиммат автомобилларни кичик миқдорда даромадини баланд қилиб қўямиз. Қиммат машинадан олаётган даромадимиз ҳисобига арзон машинадан йўқотаётган пулни қоплаяпмиз», — дея тушунтирди у.
«Ўзавтосаноат» рағбари ўринбосари 2020 йилда Spark ва Nexia автомобилларидан 550 млрд сўм йўқотиш бўлганини маълум қилди. Equinox, Malibu, Traverse ва Tahoe мошиналаридан эса 500 млрд сўм фойда кўрилгани айтилди.
«Нима қилган яхши: Equinox, Malibu кабиларни нархини тушириб, Nexia, Spark мошиналарини нархини кўтариб қўйган яхшими ёки ҳозирги ҳолатда бизнес моделни давом эттирган яхшими?», — деди у.
Азизбек Шукуров таъкидлашича, завод ўтган йили 6 фоизлик рентабеллик билан ишлаган.
2020 йилнинг учинчи чораги якунида компания соф фойдаси 1,17 трлн сўмни ташкил этди. Бу 2019 йилнинг мос даврига нисбатан (2,28 трлн сўм) қарийб икки бараварга (94 фоизга) кам.
Аввалроқ, «Газета.uz» Ўзбекистонда сотувга чиқиши кутилаётган Chevrolet Onix седани нархи — 9 мингдан 12 минг долларгача бўлиши ҳақида ёзган эди. Ушбу модел локализацияси 2022 йилнинг тўртинчи чорагидан бошланиши кутилмоқда.
Шу кунларда, UzAuto Motors ишлаб чиқарилган транспорт воситаларини етказиб беришни икки ойга чўзишни режалаштираётганини ҳам маълум қилган эди.
