Бу ҳақда Фармацевтика тармоғини ривожлантириш агентлиги матбуот хизмати хабар берди.
1 март куни ZF-UZ-VAC 2001 номли коронавируснинг янги типига қарши рекомбинант (CHO cell) хитой-ўзбек вакцинаси тиббиёт амалиётида қўллаш учун тегишли тартибда давлат рўйхатидан ўтказилди. Рўйхат рақами — DV/X 08646/03/21.
Олдинроқ Хитойнинг Zhifei Longcom Biopharmaceutical Co. Ltd компанияси коронавирусга қарши вакцинани яратишда Ўзбекистоннинг ҳиссаси ва cаъй-ҳаракатларини инобатга олиб, ZF 2001 вакцинани бирга яратган ҳаммуаллиф мамлакат сифатида белгилаган эди.
Ушбу янги вакцинани биргаликда ишлаб чиқариш ва фойдаланилишга келишилган. Ушбу вакцина Jurabek Laboratories корхонаси томонидан ишлаб чиқарилиши ҳақида хабар берган эдик.
«Ўзбекистон Республикасининг 2016 йил 4 январда тасдиқланган «Дори воситалари ва фармацевтика фаолияти тўғрисида"ги Қонуннинг 12-моддасига кўра дори воситалари, тиббий буюмлар ва тиббий техниканинг тиббиёт амалиётида қўлланилишига, қоида тариқасида, улар давлат рўйхатидан ўтказилганидан кейин рухсат этилади», — деб эслатади агентлик.
Олдинроқ Спутник V вакцинасини Ўзбекистонда қўллашга рухсат этилган эди.
27 февраль ҳолатига Ўзбекистонда коронавирусга қарши Ўзбекистон-Хитой ZF-UZ-VAC2001 вакцинаси синовида 6836 нафар кўнгилли вакцинанинг 1-дозаси, 4453 нафар кўнгилли вакцинанинг 2-дозаси ва 283 нафар кўнгилли 3-доза билан эмланди.
