АҚШнинг Pfizer ва Германиянинг BioNTech компаниялари томонидан ишлаб чиқилган вакцина Исроилдаги оммавий вакцинация жараёни натижаларига кўра, иккинчи дозадан сўнг 94% самарадорликка эга деб топилди, дея хабар берди РБК.
Бундай хулоса Исроилда бўлиб ўтган оммавий вакцинацияни кузатган олимлар таҳлилидан келиб чиқилди. Олимлар 20 декабрдан 1 февралгача бўлган муддат ичида вакцинани қабул қилган 600 минг инсон ва эмланмаган яна шунча инсон маълумотларини ўрганиб таҳлил қилишди.
BNT162b2 дея номланувчи ушбу вакцинанинг биринчи дозасидан сўнг самарадорлик 57% дея баҳоланди.
Эслатиб ўтамиз, ушбу вакцина ноябрь ойидаги клиник синовларда 90% дан юқори самарадорликни кўрсатган эди.
2020 йил охирида ЖССТ Pfizer вакцинасини фавқулодда ишлатишга рухсат берганди.
Шунингдек, аввалроқ Ўзбекистонга 100 минг дона Pfizer вакцинаси олиб келиниши, шунингдек, мамлакатда март ойининг бошида коронавирусга қарши вакцинация жараёни бошланиши мумкинлиги ҳақида хабар берган эдик.
