22 февраль куни Хитойнинг Zhifei Longcom компанияси томонидан яратилган ва Ўзбекистонга ҳаммуаллифлик ҳуқуқи берилган вакцина Олий Мажлисга тақдим этилди. Инновацион ривожланиш вазирлигининг маълум қилишича, ушбу вакцинанинг хавфсизлик даражаси 99% ни, иммуногенлик эса 97% ни ташкил этади.
Инновацион ривожланиш вазирининг биринчи ўринбосари Шахло Турдиқулованинг таъкидлашича, вакцина синовларига кўра, иккинчи дозани қабул қилгач организмда антитаначаларни ишлаб чиқариш даражаси 11 баравар ошган.
«Moderna вакцинаси билан солиштирганда ушбу вакцинанинг самарадорлиги 6 баробар юқорироқ. Яна бир қулай томони, ушбу вакцинани оддий музлатгич шароитида, 8 градусгача бўлган шароитида сақлаш ва етказиб бериш мумкин», — деди Шахло Турдиқулова.
Унинг айтишича, вакцинани ишлаб чиқарувчилар парламент тингловларида хитой-ўзбек вакцинасини рўйхатдан ўтиш процедуралари натижаларига кўра оммавий фойдаланишга тавсия этишган.
Ушбу вакцина ZF-UZ-VAC 2001 номи остида ўзбек фармацевтик компаниялари томонидан ҳам ишлаб чиқарилиши режалаштирилмоқда. Аввалроқ ушбу вакцинани Ўзбекистонда маҳаллийлаштириш учун Jurabek Laboratories МЧЖ қўшма корхонаси танлангани ҳақида хабар берган эдик.
