Ўзбекистонда бир марталик тез ёрдам чақириғи ўртача 150 минг сўмга тўғри келади. Бу ҳақда Соғлиқни сақлаш вазири ўринбосари Абдулла Азизов Ўзбекистон 24 каналига берган интервьюсида маълум қилди.
«Ҳар битта машинани бир хонадонга бориб қайтишининг харажати ўртача 150 минг сўмга тўғри келади. Албатта, бу бюджетга яна қўшимча юклама тушади дегани. Биз бу бўйича қонунчилик устида ҳам иш олиб боришимиз керак. Кўп ҳолларда сурункали касалликларга эга фуқаролар асосан „менинг иситмамни ўлчаб қўй, ёки менинг қон босимимни ўлчаб қўй“ деган мурожаатлар билан якунланади. Улар етиб бориш учун кетган харажатларнинг ҳисоб-китобини эътиборга олишмайди. Лекин бюджетга бу ўз таъсирини кўрсатади», — деди у.
Вазир ўринбосарининг сўзларига кўра, агар Европадаги тез ёрдам тизими билан солиштирилса, у ерда тез тиббий ёрдамга мурожаат қилиш, беморнинг жуда ҳам оғир ҳолатда эканлигидан далолат беради.
«Ўзбекистонда бироз бошқача амалга оширилади. Сурункали касаллиги мавжуд бўлган жуда ҳам кўп беморлар оилавий шифокорига, ўзларининг поликлиникасига бориб, олиши мумкин бўлган муолажани поликлинига бормасдан, 103 га телефон қилиб, шу орқали муаммоларни ҳал қилишга ҳаракат қилишади. Европа давлатларида сурункали касаллиги бўлган беморлар ҳеч қачон 103 ни чақирмайди. Оилавий шифокорларига бориб муаммоларини ҳал қилишади», — дея таъкидлади Абдулла Азизов.
Ўзбекистонда фақатгина фоизини олиб гапирилса, бутун чақирувлардан 40 фоиздан ортиғи сурункали касаллиги бор беморларга тўғри келади. Бу албатта чақирувларнинг қанчалик нотўғри эканлигидан далолат беради, дея қўшимча қилди соғлиқни сақлаш вазири ўринбосари.
Олдинроқ, 2020 йилда «тез ёрдам» хизматига деярли 11,5 миллионта мурожаат келиб тушганлиги ҳақида хабар берилган эди.
