Президент Шавкат Мирзиёев 18 февраль куни Наманган вилоятига икки кунлик ташрифи давомида «Даштбоғ» кичик саноат зонасига ташриф буюрди.

Шавкат Мирзиёев Наманган вилоятига ташрифи давомида 120 нафар аёл ва эркаклар ишлайдиган Dream linet tesktil компанияси раҳбари билан суҳбат қилиб, муҳим масала — аёлларнинг ишлашини тақиқлайдиган эркаклар ҳақида фикр билдирди. Президент бундай иллатлар билан янги иш ўринлари ва муносиб меҳнат шароитларини яратиш орқали курашиш кераклигига урғу берди.

«„Эри рухсат бермаса деяпти“. Бу ҳам ҳозир бизнинг Наманганда мана шу ибора пайдо бўляпти. Бу ибора билан ҳам курашишимиз керак. Нимага десангиз, ҳаммамиз тенг бўлиб, аёлларимизни ҳам муносиб иш билан таъминлашимиз керак. Сизга ўхшаган 20−30 та тадбиркор ҳокимга кўмакчи бўлса бўлди, менинг ҳамма юришим керакмас — мен ўзимни давлат ишларим билан шуғулланавераман», — деди президент «Махсус ракурс» сонида.

Шавкат Мирзиёев меҳнат миграцияси масаласига алоҳида тўхталиб ўтди.

«Ҳали кўп-кўп мана шу фуқароларимиз, сизларни қўшниларинг, кўпларни турмуш ўртоқлари четда юрибди. Менинг энг катта мақсадим, қанча оғир бўлмасин, уларни секин-секин ўзимизни бағримизга, ўзимизни маҳалламизга, ўзимизни уйимизга қайтариб олиб келишимиз керак. Оғир, лекин барбир шу марраларни олдимизга қўйишимиз керак», дея таъкидлади давлат раҳбари.

2019 йил 1 майдан бошлаб, Ўзбекистонда аёлларни айрим тармоқларда ёки касбларда иш билан таъминлашга қўйилган тақиқлар бекор қилинган эди.