1 мартдан бошлаб «Uzbekistan Airways» АЖ йўловчилари янги хизмат тури — авиакомпаниянинг қатновларига онлайн рўйхатдан ўтиш имкониятидан фойдаланишлари мумкин. Бу ҳақда компания матбуот хизмати хабар берди.
«Ушбу хизмат йўловчиларга аэропортдаги рўйхатдан ўтиш пунктида навбатда турмасликка ва самолёт бортида керакли жойни танлаш имкониятини беради», — дейилади хабарда.
Компания янги хизмат COVID-19 вируси тарқалиши шароитида исталмаган алоқаларни камайтириши мумкинлигини таъкидлаган.
Компаниянинг «Газета.uz»га маълум қилишича, рўйхатдан ўтиш бепул, лекин аниқ жойни танлаш пулли бўлади. 2018 йилнинг январь ойида компания самолётда жой танлаш хизматини йўлга қўйган эди.
Ўтган йилнинг декабрь ойида Ўзбекистон халқаро аэропортларида йўловчилар ва багажнинг мустақил рўйхатдан ўтиш тизими ўрнатилган эди.
