Жаҳон соғлиқни сақлаш ташкилоти коронавирус билан касалланиб, уни енгиб ўтганларга ҳам вакцина билан эмланишни тавсия қилди. Таъкидланишича, бемор агар ушбу вирус билан олдин тўқнаш келган бўлса, вақцина иммун тизими жавобини янада кучайтиради. Бу ҳақда ЖССТ раҳбари ўринбосари Сумия Сваминатан маълум қилди.

Унинг таъкидлашича, COVID-19'ни бошдан ўтказган беморда касаллик енгил кўринишда ёки асоратларсиз ўтган бўлса, иммунитенинг вирусга қаршилиги унчалик кучли бўлмаслиги мумкин.

Вакцина коронавирусни енгган инсонлар организми учун таниш бўлган антиген олиб киради. Шу сабаб, эмлаш ушбу касалликка кўрсатиладиган қаршиликни фақат кучайтирди, дея маълум қилди ЖССТ раҳбари ўринбосари.

Шундай бўлса-да, ЖССТнинг Ўзбекистондаги вакиллиги раҳбари Лиан Куппенснинг таъкидлашича, ҳатто эмлангандан сўнг ҳам эҳтиёт чораларига амал қилишда давом этиш лозим. «Биз ҳозирча COVID-19'га қарши вакцинанинг вирусдан ҳимоя қила олиши ёки вирус тарқалишини олдини олиши мумкинлиги ҳақида аниқ билмаймиз», — дея хабар берди у «Газета.uz»га.

«Тўғри, вакциналар касалликни олдини олиши мумкин. Бироқ вакцинанинг болалар учун самарали эканлигини исботлайдиган далилларимиз йўқлигини ҳам унутмайлик», — деди у.

Олимлар ҳозирча вакцина билан эмланган беморнинг иммунитети организмни қанчалик узоқ вақт ҳимоя қила олиши ҳақда аниқ билишмайди. ЖССТ ушбу савол ҳали ҳам ўрганилаётгани ҳақида маълум қилди.