Адлия вазири Русланбек Давлетов душанба куни вазирликда бўлиб ўтган матбуот анжуманида 2020 йил сарҳисобини қилар экан, коррупция мавзусига ҳам алоҳида тўхталиб ўтди. «Газета.uz» мухбирининг хабар беришича, вазир коррупцияга айланиб кетаётган эскичилик кўп йиллик қадрият бўлса ҳам, улардан воз кечиш лозимлигини айтган.
«Бизнинг анъаналаримиз, миллий қадриятларимиз бор, меҳмондўстлик деймиз, бошқа деймиз. Совғалар беришни жуда яхши кўради биздаги инсонлар. Янги йил бўлса ҳамма совға ташишни бошлайди. Бу йил ҳам худди шуни кузатдик. Қашқадарёдан тандир келади, Хоразмдан гуруч келади. Ҳамма жойда мана шу жараён бўлиб кетади. Эскичиликнинг шунақа сарқитлари бўладиган бўлса, яъни миллий анъаналар жамият ривожланишига тўсқинлик қилар экан, бу анъаналардан, албатта, воз кечиш керак», — деди вазир.
«Ривожланишга таъсир қилаяптими, йиллар давомида шаклланган анъанами, қадрият бўлса ҳам, маданият бўлса ҳам, барибир, воз кечишимиз керак. Меҳмондўстлик, ўзбекчилик деган гапимиз керак бўлса, салбий контекстда ишлатиладиган ҳолатда ҳам бўлиб қолаяпти. Аслида ўзбекчиликнинг тагида жуда беғубор ғоялар ётиши керак», — дея қўшимча қилди Давлетов.
У раҳбар лавозимга янги тайинланган мансабдорлар шахсий хизмат хонасини таъмирлаши ёки машина харид қилишга тушиб кетиши ҳақида ҳам фикр билдирди.
«Шунақа одат бор, янги раҳбар ишга келганидан кейин дарров хонасини таъмирлашни бошлайди. Бошидан биноларни, катта-катта пулларни харажат қилади. Мошиналар бўйича, мана, қандай муаммолар туғилаяпти. Чет эл, вилоятларга сафарлар ҳаражатларини ким қоплайди?» — дея таъкидлади вазир.
Адлия вазирлиги раҳбарининг айтишича, бунинг барчаси «менталитет билан боғлиқ бўлган коррупция». Ундан қутилиш учун эса «ҳукумат ўз амалдорларини тўғри тарбиялай олиши керак».
«Ҳамма айтадики, жамият ўзини-ўзи тарбиялай оладими? Мен ўйлайманки, биринчидан, бу давлат ва ҳукуматнинг масъулияти. Одамларга шуни тўғри тушунтириш, янги ғоялар ва стандартларни жорий қилиш керак. Чунки коррупция асосан қаерда бўлаяпти? Давлат иштирок этган бўғинда бўлаяпти. Яъни, амалдорлар билан боғлиқ бўлган бўғинда бўлаяпти. Шунинг учун, биринчи навбатда, ҳукумат ўзининг амалдорларини тўғри тарбиялай олиши керак. Бу сигналларни жамиятга юбориши, улар кейин қабул қилиниб, керак бўлса, ўзимизнинг жамиятда юриш-туриш қоидаларимиз ҳам шунга қараб ўзгариши лозим. Бу менталитет билан боғлиқ бўлган коррупция. Корея худди шу ўзига яраша миллий анъанавий муносабатларидан коррупцияни йўқотиш мақсадида воз кеча олган», — деди вазир.
Бундан ташқари, анжуманда сўнгги вақтларда жамиятда коррупцияга нисбатан тоқатсизлик, жамоатчиликнинг халқ пули — бюджет маблағлари қандай сарфланаётганига қизиқиши ортиб бораётгани қайд этилди.
«Жамиятимизда коррупцияга нисбатан тоқатсизлик ошди. Чунки жамоатчилик янги хабарлар билан танишиб, ўзининг нафратини баён қила олди. Айниқса, мана, шаффофликнинг орқасидан келиб чиқиб, давлат органлари ўзларининг давлат харидларини очиқлашни бошлаганидан кейин муаммолар кўзга ташланишни бошлади. Жамоатчилик халқ пули, бюджет пули қаёққа, қандай сарфланаётганини кўраяпти. Бу жуда ҳам ижобий жараён ва давлат органлари масъулиятини оширишда жуда яхши механизм сифатида ўртага чиқаяпти. Адлия вазирлиги буни қўллаб-қувватлайди. Ҳали шаффофлик бўйича қиладиган ишларимиз жуда кўп. Давлат дастурида кўрган бўлсангизлар, очиқ ва ҳисобдор ҳукумат деган дастур ишлаб чиқилиши керак. Адлия вазирлиги аллақачон лойиҳани ишлаб чиққан», — деди Давлетов.
