Республика махсус комиссиясининг навбатдаги йиғилишида мамлакатда барқарор эпидемиологик вазиятни сақлаб қолиш мақсадида коронавирус инфекциясига қарши эмлаш бўйича амалга оширилаётган ишлар муҳокама қилинди. Бу ҳақда ССВ хабар бермоқда.

Йиғилишида шунингдек, Санитария-эпидемиологик осойишталик ва жамоат саломатлиги хизмати раҳбари Баҳодир Юсупалиевнинг Ўзбекистон делегациясининг Россияга ташрифи ва «Sputnik V» вакцинасини ўрганиш натижалари бўйича ҳисоботи тингланди.

Унда вакцинанинг учинчи босқич клиник синовлари якунига етказилгани ҳамда Россияда рўйхатдан ўтказилгани айтилди. Шунингдек, вакцинани Ўзбекистонда сертификатлаштириш ва рўйхатдан ўтказиш бўйича таклифлар келиб тушгани таъкидланди.

Комиссия аъзолари Россия томони тақдим этган учинчи босқич клиник синовлари натижалари таҳлилини муҳокама қилиб, бирламчи босқичда сертификатлаштириш ҳамда рўйхатдан ўтказиш жараёнини бошлаш мумкинлигини маъқуллади.

Аввалроқ, «Газета.uz» Комиссия қарори билан Германияга авиақатновлар бўйича ўрнатилган чеклов бекор қилингани ҳақида ёзган эди. Шу билан бирга, коронавирусга қарши биринчи навбатда эмланадиган аҳоли тоифаси ҳам маълум қилинди.