10 февраль куни президент Шавкат Мирзиёев янги ташкил этиладиган Digital Holding корхонасининг вазифаларини белгилайдиган янги қарорни имзолади.
Аввалроқ «USM Telecom» ва МегаФон ўзбекистонлик ҳамкорлар билан биргаликда янги қўшма корхона — Digital Holding’ни ташкил этиши ҳақида хабар берган эдик. Ҳукумат янги қўшма корхонага Ucell’нинг 100% устав капиталини ўтказишни кўзда тутган.
Қарорга кўра, Digital Holding корхонасига электрон тижоратни ривожлантириш бўйича консультация, маркалаш тизимини яратишда иштирок этиш, рақамли бозорни йўлга қўйиш, тўлов хизматлари тизимини яратиш, янги телекоммуникация тизимини қуриш каби асосий вазифалар қўйилган.
Шунингдек, қарорда давлат органлари ва бошқа ташкилотларга Digital Holding билан тўғридан-тўғри музокаралар асосида, тендерларсиз шартномалар тузишга рухсат берилиши айтилган. Инвестиция шартномаси муддати давомида компаниялар баъзи солиқлардан озод қилинади.
Шу билан бирга, компанияларга ўз эҳтиёжлари учун ўзларининг ер усти станцияларини яратиш ва халқаро сунъий йўлдош алоқалари провайдерларини мустақил танлаш ҳуқуқи берилди.
Бундан ташқари, Digital Holding станцияларни қуриш учун доимий фойдаланишга мўлжалланган ер участкаларини аукционларсиз олиш имкониятига эга бўлади.
Шунингдек, «Ўзбектелеком»га ўз эҳтиёжлари учун «МегаФон» ва Ucell билан ташқи интернет каналларини (яъни Ucell «Ўзбектелеком» алоқа каналларидан фойдаланган ҳолда ташқи каналларни «МегаФон»дан сотиб олиш имконияти) сотиб олиш тўғрисида шартнома тузиш тавсия этилади.
