3 февраль куни Ўзбекистон ва Сан-Марино мамлакатлари ўртасида дипломатик алоқаларни ўрнатиш бўйича протоколни имзолаш расмий маросими бўлиб ўтди, дея хабар берди «Дунё» ахборот агентлиги.
Ўзбекистоннинг Италиядаги элчихонаси маълумотларига кўра, ҳужжатни Ўзбекистон томонидан элчи Отабек Акбаров, Сан-Маринодан эса мамлакатнинг Италиядаги элчиси Даниэла Ротондаро имзолаган.
Икки мамлакатда ички процедуралар ўтказилгач, протокол кучга киради ва Сан-Марино Ўзбекистон билан дипломатик муносабатлар ўрнатган 136-давлатга айланади.
Сан-Марино дунёдаги энг кичик давлатлардан бири ҳисобланади. Мамлакат Жанубий Европада жойлашган ва тўрт томондан ҳам Италия билан чегарадош. Дунёдаги энг қадимги конституциялардан бири амал қиладиган Сан-Марино унинг замонавий чегараси эътиборга олинганда Европанинг энг узоқ тарихга эга давлати ҳисобланади (301 йилда ташкил топган). Бундан ташқари, Сан-Марино аҳоли жон бошига ялпи ички маҳсулот кўрсаткичи (2020 йил — 56 минг 690 доллар) бўйича дунёдаги энг бой мамлакатлардан бири ҳисобланади.
Сан-Марино элчиси икки томонлама муносабатларни савдо-иқтисодий ҳамкорлик орқали ривожлантиришдан манфаатдорлигини билдирди. Шунингдек, у Европа Иттифоқи билан яқин алоқада бўлган Сан-Марино Ўзбекистон компаниялари ва экспортчиларига Европа бозорларига чиқиш учун яхши имкониятлар яратиши мумкинлигини таъкидлади.
Яна бир муҳим йўналиш деб туризм соҳасидаги ҳакорлик тилга олинди. Маълумот учун, Сан-Маринога ҳар йили 3 млн дан зиёд сайёҳ ташриф буюради. Мамлакат бу борадаги тажрибаси билан алмашишга тайёрлигини билдирди.
