АҚШ Вашингтонни қўриқлаш учун 480 млн доллар сарфлади
Трамп тарафдорлари Капитолийга бостириб кирганидан сўнг 25 мингга яқин AҚШ миллий гвардияси аскарларининг Вашингтонга жойлаштирилиши AҚШ ҳукуматига камида 480 млн долларга тушди. Bloomberg’нинг таъкидлашича, ушбу маблағларга пойтахт маъмуриятининг тартибсизликлар содир бўлган кунида Капитолийга қўшимча полиция бўлинмаларини юбориш учун харажатлари киритилмаган. 2 февраль куни Пентагон вакили Жон Кирби хавфсизлик учун Вашингтонга юборилган Миллий гвардия шаҳарда зарур бўлган вақтгача қолишини маълум қилди. — Bloomberg.
AҚШ чет элдан келган қочқинларни қабул қилиш квотасини оширди
AҚШнинг янги маъмурияти чет элдан қочқинларни қабул қилиш квотасини кўпайтирмоқда ва бу йил уни 125 минг кишига етказмоқчи. Бу ҳақда мамлакат президенти Жо Байден AҚШ Ташқи ишлар вазирлигида ўзининг ташқи сиёсатининг асосий йўналишларини таништирган нутқи давомида маълум қилди. «Бугун мен мисли кўрилмаган глобал эҳтиёжларни қондиришга ёрдам бериш учун қочқинларни қабул қилиш дастурини тиклаш бўйича оғир ишларни бошлайдиган фармонни имзолайман. Шунчалик жиддий зарар кўрган нарсаларни тиклаш учун вақт керак бўлади. Ушбу фармон биринчи тўлиқ молиявий йилда 125 минг кишига қочқинларни қабул қилиш квотасини тиклашимизга имкон беради», — деди Байден. Дональд Трамп президентлиги даврида қочқинлар квотаси 2016 йил молиявий йилидаги 85 минг кишидан 2021 йилда 15 минг кишига камайтирилди. АҚШда молиявий йил 1 октябрдан бошланади. — ТАСС.
Туркия сайёҳлик мавсумини апрель ойида очади
Туркия сайёҳлик мавсумини 2021 йил апрель ойида очади — аввал Ўрта денгизда, сўнг Эгей денгизининг соҳилида. Бу ҳақда мамлакат туризм вазири Меҳмет Эрсой маълум қилди. «Мавсум Ўрта ер денгизи соҳилларидан бошланади ва кейин Эгейга тарқалади», — деди вазир. Эрсойнинг таъкидлашича, биринчи бўлиб Туркияга европаликлар келади. Шунингдек, унинг айтишича, 19 май куни Рамазон ойи бошланиши муносабати билан мусулмон сайёҳлар кела бошлайди. Туризмнинг август ойида тўлиқ тикланиши кутилмоқда. 2020 йил натижаларини сарҳисоб қилган Эрсой, Туркия Греция ва Испаниядаги каби кўплаб сайёҳларни йўқотмаганлигини таъкидлади, чунки хавфсиз сертификатлаш дастури туфайли мамлакат чет элликлар учун очиқ эди. Туркияга жами 16 млн чет эллик меҳмонлар келган, улардан келиб тушган даромад 12,1 млрд долларни ташкил этган. — Интерфакс.
ЕОИИ таълим соҳасида ягона портал яратади
Евроосиё Иқтисодий Иттифоқи (ЕОИИ) доирасида таълим соҳасидаги ягона ахборот портали яратилиши кераклиги таклиф этилди Евроосиё ҳукуматлараро кенгаши йиғилиши пайтида. «Таълим соҳасида ягона ахборот порталини яратиш режалаштирилган. Бугун биз қозоғистонлик шерикларимизнинг ажойиб ишланмаларига гувоҳ бўлдик. ЕОИИ давлатлари бўйлаб энг машҳур мутахассисликлар бўйича касбий малакаларнинг, шунингдек илмий даражалар ва унвонларнинг тан олинишини таъминлаш керак», — деди Россия бош вазири Мишустин. — РИА Новости.
Германияда концлагерь комендантининг 95 ёшли собиқ котибасига айблов ҳукми чиқарилди
Германияда Штутгоф концентрацион лагери комендантининг 95 ёшли собиқ аёл котибига 10 мингга яқин маҳбусни ўлдиришда ва қотилликка уринишда иштирок этганлиги сабабли айблов ҳукми чиқарилди. «Биз Штутгоф концлагери комендантининг собиқ котибига қарши айбловлар қўйдик. Биз уни 10 мингдан ортиқ қотилликлар ва қотилликка уринишда алоқадорликда айблаймиз», — деди прокурор Петер Мюллер-Раков. Штутгоф концлагери 1939 йилда Польшада ташкил этилган. — РИА Новости.
Осиё-Тинч океани минтақаси 2030 йилгача жанговар самолётларнинг энг йирик импортчисига айланади
Осиё-Тинч океани минтақаси (ОТОМ) 2021 йилдан 2030 йилгача ҳарбий самолётларнинг энг йирик импорт қилувчисига айланади. Бундай маълумотлар Aviation Week & Space Technology журналининг ҳисоботида (Aero India 2021 кўргазмаси) келтирилган. Нашрнинг таъкидлашича, белгиланган муддат ичида ишлаб чиқариладиган ҳарбий самолётларнинг тахминан 37,5 фоизини ОТОМ мамлакатлари сотиб олади. Ушбу даврда ОТОМ мамлакатларига (Хитой бундан мустасно) 1,5 мингга яқин ҳарбий самолётлар етказиб берилиши тахмин қилинмоқда. Ҳиндистон 2021−2030 йилларда Осиё-Тинч океани минтақасидаги энг йирик харидорига айланади, у 640 га яқин самолёт сотиб олиши кутилмоқда. Иккинчи ўринни Жанубий Корея эгаллайди (тахминан 120 та самолёт), учинчи ўринни Япония (100 га яқин самолёт) эгаллайди. Журнал мутахассислари Вьетнам 100 га яқин, Малайзия — 80−90, Индонезия — 55, Бангладеш — 30 та ҳарбий самолёт сотиб олишларини тахмин қилишди. — ТАСС.
