Мьянма ҳарбий ҳукумати Facebook’ни блоклади
Мьянма ҳарбий ҳукумати интернет-провайдерларга мамлакатдаги давлат тўнтаришидан бир неча кун ўтгач, норозилик намойишлари кучайиб бораётган бир пайтда Facebook’га киришни вақтинча тўсиб қўйиш бўйича буйруқ берди. «Биз расмийлардан Мьянмадаги одамлар ўз оилалари ва дўстлари билан мулоқот қилишлари ва муҳим маълумотларга эга бўлишлари учун алоқани тиклашни талаб қиламиз», — дейилади Facebook вакилининг баёнотида. Бундан ташқари, мамлакатда Instagram, WhatsApp ва Facebook Messenger мессенжерлари блокланган, деб хабар беради NetBlocks интернет мониторинг хизмати. Баъзи ОАВларнинг хабарларига кўра, ҳарбий ҳукумат буйруғи билан провайдерларга 7 февраль куни ярим тунгача Facebook’га киришни чеклаш тўғрисида кўрсатма берилган. — Bloomberg.
1 февраль куни Мьянмада ҳарбий тўнтариш содир бўлди. Ҳокимият қуролли кучларнинг бош қўмондони Мин Aунг Хлайнуга ўтди, вице-президент Мьинт Шве президент вазифасини бажарувчи этиб тайинланди. Ҳарбийлар бир йилга фавқулодда ҳолат эълон қилди. 3 февраль куни мамлакат ҳарбий кучлари илгари ҳибсга олинган 400 га яқин кишини, шу жумладан, ҳукмрон Демократия учун Миллий Лига партиясидан бўлган депутатларни озод қилди. 4 февраль куни БМТ бош котиби Aнтониу Гутерриш Мьянмада мамлакатда ҳокимиятни ҳарбий қўлга киритиш натижасида ҳибсга олинганларнинг барчасини озод қилишга чақирди.
2 февраль куни БМТнинг Хавфсизлик кенгаши Мьянма масаласини муҳокама қилиш учун йиғилган. Кенгаш баёноти «ҳарбий тўнтаришни қоралаш» ва ҳарбийларни «ноқонуний ҳибсга олинганларни зудлик билан озод қилишга» чақиришга қаратилган бўлган. Бироқ Кенгаш бу ҳақда эълон қила олмади, чунки БМТнинг Хитой ва Россиядаги элчилари келишувга эришишдан олдин Пекин ва Москванинг тегишли кўрсатмалари бўлишларини айтдилар.
БМТ озиқ-овқат маҳсулотларининг жаҳон нархларида рекорд даражадаги ўсишни қайд этди
Жаҳонда озиқ-овқат нархлари январь ойида кескин кўтарилиб, 2014 йил июлидан бери энг юқори кўрстакич қайд этилди. Январь ойида озиқ-овқат нархлари индекси 113,3 ташкил этди, бу 2020 йил декабрга нисбатан 4,3 фоизга юқори. Ёрма маҳсулотлари индекслари декабрь ойига нисбатан 7,1 фоизга ўсди, бунга маккажўхори учун халқаро нархларнинг кескин ўсиши (11,2 фоизга) сабаб бўлди. 2020 йил январь ойига нисбатан маккажўхори 42,3 фоизга қимматлашди. Глобал талабининг ўсиши ва Россиядан сотувлар пасайиши кутилмалари натижасида буғдой нархи 6,8 фоизга ошди. Шунингдек, гуруч нархлари Осиё ва Aфриканинг кучли талаби билан кўтарилди. Ўсимлик ёғи нархлари индекси январь ойида 5,8 фоизга ўсди ва 2012 йил май ойидан бери энг юқори даражага етди. Шакар нархлари индекси декабрь ойига нисбатан 8,1 фоизга ўсди. — БМТнинг озиқ-овқат ва қишлоқ хўжалиги ташкилоти (FAO).
Исроил Сурияга ҳаводан ҳужум қилди
Исроил ҳаво кучлари 4 февраль кечқурун Суриянинг жанубига ҳужум қилди. Суриянинг SANA агентлигининг хабар беришича, Сурия мудофаа кучлари мамлакатнинг жанубига отилган деярли барча ракеталарни тутиб қолишган. Step News Agency’нинг хабарига кўра, Дамашқ атрофидаги ҳудуд, шу жумладан, пойтахт аэропорти ва Сурия ҳарбийлари назоратидаги объектлар жойлашган ҳудуд ҳам нишонга олинган. The Jerusalem Post’нинг таъкидлашича, зарбалар Эрондан Исроил ва Ливанга қурол юборилиши мумкинлиги маълум бўлганидан кўп ўтмай амалга оширилган. — The Jerusalem Post.
АҚШнинг Огайо штатида Трампнинг туғилган кунини штатда дам олиш куни деб белгилашни таклиф этишди
Огайо штатидаги республикачилари 14 июнь, AҚШнинг собиқ президенти Дональд Трампнинг туғилган кунини, штатда дам олиш деб белгилашни таклиф қилишмоқда. Штат Вакиллар Палатаси республикачилари Жон Кросс ва Режи Штольцфус партиядошларини ушбу ташаббусни қўллаб-қувватлашган ва 14 июнни дам олиш куни — президент Дональд Трамп кунига айлантиришга чақиришмоқда. Қонун чиқарувчиларнинг фикрига кўра, Aмериканинг собиқ раҳбари «жиддий қийинчиликларга қарамай, АҚШни мисли кўрилмаган фаровонликка олиб келган кўплаб ишларни амалга оширди». — CNN.
