Мьянма қуролли кучлари ҳукумат раҳбарлари ҳибсга олинганидан кейин бир йил давомида мамлакатда фавқулодда ҳолат эълон қилди. Бу ҳақда Синьхуа агентлиги маълумотларига таяниб, ТАСС хабар бермоқда.
Ҳарбийлар фавқулодда ҳолат бўйича ҳужжатни мамлакатнинг президенти в. б. этиб эълон қилинган вице-президент Мьин Све томонидан имзоланганини маълум қилишди. Шунингдек, улар мамлакатда ҳокимият Мьянма қуролли кучларининг бош қўмондони Мин Аун Хлаинга ўтказилишини айтишган. Reuters хабарига кўра, ҳарбийлар бу қарор сохталаштирилган парламент сайловлари туфайли қабул қилинганини таъкидламоқда.
Аввалроқ Мьянма президенти Вин Мьин ва Демократия учун миллий лига партияси раҳбари Аун Сан Су Чжи душанба куни эрталаб ҳибсга олинганлиги хабар қилинган. Партиянинг бошқа юқори лавозимдагилари ҳам қўлга олингани маълум қилинди.
Ноябрь ойида бўлиб ўтган сайловларда Демократия учун миллий лига партияси 476 ўриндан 396 тасини қўлга киритиб, ғолиб бўлган эди. Бу партияга яна беш йилга ҳукумат тузишга имкон берди. Ҳарбийлар томонидан қўллаб-қувватланган Иттифоқ бирдамлиги ва тараққиёт партияси фақат 33 ўринни эгаллади. Ҳарбийлар фирибгарликдан шикоят қилиб, натижалар бўйича Олий судга мурожаат қилганлар. Сайлов комиссияси фирибгарликни исботловчи далил топмаган.
Мьянма президенти ва давлат маслаҳатчисининг ҳибсга олинишини БМТ Бош котиби Антониу Гутерриш ва бир неча мамлакат раҳбарлари қоралади.
1988 йилда тинч намойишларга раҳбарлик қилгани учун Аун Сан Су Чжи уй қамоғига олинган ва у ерда жами 15 йил — 2010 йилгача бўлган. 1991 йилда у Нобель мукофотига сазовор бўлди.
2018 йил ноябрь ойида Аун Сан Су Чи роҳинжа мусулмон халқининг таъқиб қилиниши сабабли «Виждон элчиси» мукофотидан маҳрум қилинди. Ўша пайтда БМТнинг махсус миссияси Мьянма армияси роҳинжаларни қатл қилишда иштирок этганини ва ҳукумат бу халққа нисбатан нафратни тарғиб қилишга рухсат берганини даъво қилди.
