Соғлиқни сақлаш вазири ўринбосари — Санитария-эпидемиологик осойишталик ва жамоат саломатлиги хизмати бошлиғи Баҳодир Юсупалиев Ўзбекистонда илк бор COVID-19`нинг «британча штамми» қайд этилганини маълум қилди.
2010 йилда туғилган пойтахтлик фуқаро Ш. оила аъзолари билан биргаликда БААнинг Дубай шаҳрига сафар қилиб, 2021 йилнинг 23 январь куни Тошкентга қайтган. Халқаро аэропортда фуқародан экспресс усулда тест олинганда, унда мусбат натижа қайд қилинган. Шундан сўнг, бемор зудлик билан юқумли касалликлар шифохонасига ётқизилган ва унга вируснинг симптомсиз кечиши ташхиси қўйилган.
Вазир ўринбосарининг айтишича, SARS-CoV-2 вируси геномини ўрганиш учун Инновацион ривожлантириш вазирлиги ҳузуридаги Илғор технологиялар марказига юқумли касалликлар шифохонасидан ПЗР усулида олинган 33 та мусбат натижали томоқ-бурун намунаси «британча штамм»ни аниқлаш мақсадида юборилган. Ушбу намуналар ПЗР скрининги орқали биринчи босқич текширувидан ўтказилган.
«Натижада, улар орасида мутацияга учраган намуналар ҳам аниқланган. Куни кеча иккинчи тест босқичида мутация аниқланган намуналардан бирининг геном қисмларида «британча штамм»га хос бўлган қўшимча мутация мавжудлиги тасдиқланган. Бу намуна эса 10 ёшли бемор Ш. (қиз бола)га тегишли экани маълум бўлган», — деди Баҳодир Юсупалиев.
Ҳозирда беморнинг умумий ҳолати қониқарли, шикоятлари йўқ, тегишли тиббий стандартлар бўйича даво муолажаларини олмоқда. Бемор билан бирга бўлган оила аъзоларида манфий натижа аниқлангани сабабли уй шароитида изоляцияга рухсат берилган.
ССВ аҳолини хушёрликка чақириб, ўзбекистонликлардан зарурат бўлмаганда чет эл сафарларига вақтинча чиқмай туришларини сўради.
Аввалроқ, «Газета.uz» коронавируснинг янги штамми олдингисидан 70% га кучлироқ экани ҳақида ёзган эди.
