Ўзбекистонда президентлик сайловларини октябрь ойига кўчириш таклиф қилинган эди. Шу сабабдан сайловга оид қонун лойиҳасига ўзгартириш киритилиши мумкин.
ЎзА маълум қилишича, Олий Мажлиси Қонунчилик палатаси депутати Акшагул Тулегенова бунга қуйидаги омиллар сабаб эканлигини айтди:
- сайловлардан кейинги сиёсий тадбирлар (парламент биринчи мажлисини ўтказиш, Ҳукуматни шакллантириш, давлат раҳбарининг Олий Мажлисга Мурожаатномаси) янги йилнинг биринчи чораги охирига қадар чўзилишига олиб келиб, натижада Давлат дастурини қабул қилиш ва бошқа ислоҳотлар кечиктирилишига сабаб бўлади;
- қатор хорижий давлатларнинг байрамлари арафасига (масалан, рождество 25 декабрь) тўғри келиши сабабли жаҳон миқёсида обрўга эга бўлган халқаро кузатувчиларнинг сайловда иштирокини таъминлашда муайян қийинчиликларни вужудга келтиради;
- декабрь ойи қиш мавсумига тўғри келиши сабабли сайловолди ташвиқоти тадбирларини кенг қамровли ўтказиш ва унда сайловчиларни жалб этишда қатор ноқулайликлар келиб чиқишига сабаб бўлади.
