Ишсизликни бартараф этиш мақсадида ҳозирда Олий ва ўрта махсус таълим вазирлиги тасарруфида бўлган коллежлар Бандлик ва меҳнат муносабатлари вазирлигига ўтказилади. Бу ҳақда 21 январь куни Шавкат Мирзиёев Бухоро вилояти Олот туманида вилоят фаоллари билан бўлиб ўтган йиғилишда айтиб ўтди, дея хабар берди Kun.uz.
«Барча коллежлар Бандлик ва меҳнат муносабатлари вазирлиги тасарруфига ўтказилади. Ўзи коллежларнинг жойи шу вазирликда, олий таълимда эмас. Сабаби, вазир Нозим Ҳусанов коллежларга аниқ буюртмалар шакллантириб беради. Коллежлар эса ҳар бир ҳудудларга зарур бўлган мутахассисларни тайёрлайди», — деди президент.
Шавкат Мирзиёевнинг айтишича, коллежлар ёшларни касбларга ўргатиб, бу бўйича сертификатлар беришни йўлга қўяди.
«Масалан, ҳозирги кунда пайвандчиларга талаб катта. Ана шундай касбни коллежлар тизимида ўргатиб, сертификат ҳам берилади. Ҳунар ўргангандан кейин чет элга борса ҳам иши юришаверади. Бундан ташқари, автомобиллар таъмирловчи, сартарош, этикдўз каби ўнлаб ҳунарлар бор. Мана, ишсизлик, темир дафтарни тугатиш бўйича аниқ режа», — деди давлат раҳбари.
Шунингдек Ishga marhamat мономарказларини ва маҳаллаларни коллежларга бириктириш топшириғи берилди.
