Олдинроқ қўшиқчиликни тарк этганлигини эълон қилган собиқ хонанда Жаҳонгир Отажонов президентлик сайловларида қатнашиш истаги борлигини маълум қилди.
«Менинг ҳам президент бўлиш ниятим бор ва, албатта, бўламан, деб умид қиламан. Зотан, Қуръони Каримда кимки нимага интилса, шунга эришади, дейилган. Президент бўлишдан мақсадим шуки, ўзбек халқига, Ўзбекистонга ҳалол, Ўзбекистонни ривожлантириш учун хизмат қилиш», — дейди артист ўз Instagram саҳифасида.
«Албатта, бу гапим билан мен ҳозирги давлат раҳбарларига ҳеч қандай эътироз билдирмоқчи эмасман, бунга ҳаққим йўқ. Улар ҳам ўзининг қўлдан келганча ҳаракатини қилишяпти. Бир нарсага эришиш, албатта, осон бўлмайди. Ҳаммасига омад тилайман!»
Жаҳонгир Отажонов ҳозирда оиласи билан чет элда эканлигини, яқинда Тошкентга қайтишини айтган.
«Айтмоқчи бўлганим, дуо қилинглар, ният қилинглар. Бу йилги президент сайловларига қатнашиш учун нима қилиш керак бўлса, ҳаракатини қиламан. Партия қилиш керак бўлса, қиламан. Мободо, бу сафар улгурмасам, кейинги сафар, албатта, бўламан», — дейди собиқ хонанда.
У жамоа тузиб, Ўзбекистон Ўрта Осиёдаги энг зўр давлатга айлантиришини айтган.
Эслатиб ўтамиз, 2009 йил 1 июлидан бошлаб Ўзбекистон сайлов қонунчилигидан президентлик ва депутатликка номзодларни ташаббускор сайловчилар гуруҳлари орқали кўрсатиш тартиби чиқариб ташланган.
Президент Шавкат Мирзиёев парламентга мурожаатномасида Ўзбекистон халқаро кузатувчиларнинг 2021 йилги сайловни ўтказиш бўйича «бизга тўғри келадиган» тавсияларини қонунчилик ва амалиётга тадбиқ этишда давом этишини маълум қилган эди.
2021 йилда Марказий сайлов комиссиясини давлат бюджетидан молиялаштириш 74 мартага кўпайтирилган — 4,1 млрд сўмдан 304,2 млрд сўмга. Молиялаштиришнинг кескин ошиши, эҳтимол президент сайловларига тайёргарлик кўриш билан боғлиқ бўлиши мумкин.
