2021 йилги давлат дастурига оид президент фармони лойиҳасидан коронавирус пандемияси шароитида тадбиркорлик субъектларини қўллаб-қувватлаш чораларини давом эттириш ҳам ўрин олган.

Унга кўра, қуйидагиларнинг амал қилиш муддати 2021 йил 31 декабрга қадар узайтирилади:

  • туризм, транспорт ва умумий овқатланиш соҳаларига берилган ер ва мол-мулк солиғини тўлаш бўйича имтиёзларга оид 20 мингта тадбиркорлик субъектининг 2020 йил якунига қадар кечиктирилган 400 миллиард сўмни қайтариши;
  • президентининг 2020 йил 19 мартдаги [ПФ-5969 сон] фармонида назарда тутилган мол-мулк солиғи ва ер солиғи бўйича пенялар ҳисобланишини тўхтатиб туриш, шунингдек солиқ қарзини мажбурий ундириш чоралари кўрилишига чеклов
    (2020 йил 31 декабрь ҳолатига мавжуд солиқ қарзга нисбатан);
  • президентининг 2020 йил 3 апрелдаги [ПФ-5978‑сон] фармонида назарда тутилган микрофирма, кичик корхона ва якка тартибдаги тадбиркорларга маҳаллий давлат ҳокимияти органларига ариза бермасдан туриб солиқ органларини хабардор қилган ҳолда мол-мулк солиғи ва ер солиғи бўйича берилган фоизсиз кечиктириш (бўлиб-бўлиб тўлаш) тартиби;
  • «хуфиёна иқтисодиёт» улушини қисқартириш учун солиқ аудити ўтказишда «таҳлика-таҳлил» тизими босқичма-босқич жорий этилган ҳолда солиқларни ва бошқа мажбурий тўловларни ўз вақтида тўлаб келаётган кичик тадбиркорлик субъектларида солиқ аудити ўтказилишига мораторий.

Аввалроқ, «Газета.uz» 2021 йилги давлат дастури лойиҳасида 1 мартдан бошлаб маҳаллий авиарейсларга cash back, яъни чипта нархининг 30 фоизи қайтариш, электр энергияси ва газ импорти бўйича монополияни бекор қилиш, ноқонуний кесилган ҳар туп дарахт учун 100 туп кўчат экишга мажбурлаш, янги автомобилни техник кўрикдан ўтказиш талабини бекор қилиш ҳамда ишламайдиган фуқароларга ҳам пенсия бериш тартибини жорий этиш каби таклифлар ҳам акс этгани ҳақида ёзган эди.