Тарихдаги энг кенг масштабли вакцинация кампанияси бошланганидан буён дунё бўйлаб жами 49 мамлакатда 35 млн киши коронавирусга қарши эмланди. Бу ҳақда Bloomberg хабар берди.

Pfizer/BioNTech вакцинасини қўллаш бўйича рухсат берилгач Шимолий Америка, Европа ва Яқин Шарқдаги бир қатор мамлакатларда оммавий эмлаш жараёни бошлаб юборилди. Шунингдек, Moderna вакцинаси 95% самарали деб топилди, AstraZeneca/Oxford вакцинаси ҳам Буюк Британияда оммавий қўллаш учун тасдиқланди. Кейинчалик Хитой ҳам Sinopharm вакцинасини қўллашга рухсат берди ва февраль ойигача 50 млн кишини эмлашни режалаштирган.

(Яшил рангда кўрсатилган мамлакатларда вакцинацияга старт берилган)

Ҳозирда АҚШнинг ўзида 12 млн га яқин инсон вирусга қарши эмланган. Исроил эса 2,2 млн кишини эмлаган, яъни бу ҳар юз кишининг 24 нафари вакцина қилинганлигини англатади.

Эслатиб ўтамиз, айни дамда Ўзбекистонда Хитойнинг ZF 2001 вакцинасининг учинчи босқич синовлари ўтказилмоқда.