UzReport TV сентябрь ойида кўрсатувни суратга олиш вақтида канал тасвирчисига ҳужум бўлганлигини ва камера синдирилганлигини маълум қилди. Суд қарорида ушбу фактлар қайд этилмаганлиги айтилмоқда.
Маълумотга кўра, 2020 йил 13 сентябрь куни Чилонзор тумани Муқимий кўчасида ЙТҲ содир бўлади. Uzreport TV ижодкорлари Давлат йўл ҳаракати хавфсизлиги ходими Қаҳрамон Худайберганов бошчилигида воқеа жойига келиб, кўрсатув учун тасвирга олишни бошлайди.
Шунда, ЙТҲга тўғридан-тўғри алоқаси бўлмаган бир неча фуқаро уларга тўсқинлик қилади.
Uzreport TV тасвирчиси Фаёз Бахтиёров воқеа жойини тасвирга олаётганида, Чилонзор туманида истиқомат қилувчи икки нафар шахс унинг олдига келиб, қўпол гаплар билан таҳдид қилишади ва ўз ҳатти-ҳаракатлари билан камерани синдиришганини айтади. Ҳолат юзасидан ушбу фуқароларга қонуний чора кўрилишни сўраб тасвирчи ички ишлар органларига ариза тақдим этган.
Канал томонидан тарқатилган видеолавҳада йўл ҳаракати хавфсизлиги ходими участка нозири Ҳумоюн Турсуновдан иш бўйича Аюбхонни (тасвирчига ҳужум қилган шахслардан бири — таҳр.) жалб қиласизми деб сўраганида, участка нозири «Ҳозир Аюбхонни топишга ҳаракат қиламан. Кўрдингизку, таниши больницага кетди. Кўрсатмасини оламан. У фуқаро қочиб кетмайди, эртага топиб бераман у фуқарони. Камерага етказган шикастига эртага қонуний жавоб беради», дейди.
Участка нозири у одамни танишини таъкидлаб, «Эртага шу инсон келсин, ман уни чақиртираман. Возместить қилади ущербни», деб айтади.
23 сентябрь куни Чилонзор тумани маъмурий судининг ушбу иш юзасидан қарори чиқади. Суд қарорига кўра, қонунбузарлар жарима тўлашган.
Тасвирчи Фаёз Бахтиёров суд ҳукмидан норози эканлигини таъкидлайди: «Суд ҳукмидан норозиман. Чунки у ерда мани кўчада кетаётганимда иккита фуқаро манга ташланганлиги, ман билан кўча безорилиги жанги бўлганлиги ҳақида ёзилган. Лекин ман ундан қониқмайман. Чунки, аризамда ёзганимдек, хизмат вазифамни бажараётган жойимда менга таҳдид қилишиб, камерамни синдиришган».
Воқеа жойида бўлган ички ишлар участка нозирининг кейинчалик судга тақдим этган баённома, ариза ва билдиргиларида ишнинг баёни бутунлай бошқача кўринишда бўлганлиги айтилмоқда.
Uzreport TV канали юристи Мирзохид Ғаниев ҳам суд қарорида воқеа умуман бошқача баён этилганлигини таъкидлайди. «Қарорнинг баён қисмида фуқаролар Чилонзор туманининг ҳудудида бир-бирлари билан урушиб, жамоат тартибини бузишганлиги аниқланган дейилган».
Бундан ташқари, суд қарорида каналнинг камераси синдирилиб, моддий зарар етказилганлиги, шунингдек ички ишлар ходимларининг қонуний талаблари бажарилмаганлиги ҳолати ёритилмаган.
Канал мутасаддилари ушбу қарор юзасидан кассация тартибида шикоят қилишини маълум қилган.
Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси Комил Алламжонов ушбу ҳолатга муносабат билдириб, «ҳуқуқ тартибот органлари ходимлари тўғри ва адолатли баҳо бериши, айбдорлар эса қонунда белгиланган жазога тортилиши шарт"лигини таъкидлади.
«Биз хуқуқий давлатда яшаймиз. Қонун устуворлигига эришиш ўз қўлимизда. Ушбу холатни охиригача кузатиб борамиз», — деди у.
