АҚШ Вакиллар палатаси амалдаги президент Доналд Трампга импичмент эълон қилиш учун овоз берди, деб хабар бермоқда The New York Times. У мамлакат тарихида икки марта импичмент эълон қилинган биринчи президент бўлди.
Конгрессменлар Доналд Трампни Конгресс биносига бостириб кирган оломонни қўзғатганлиги учун АҚШ ҳукуматига қарши «исён қўзғаганликда» айблашмоқда. 232 конгрессмен импичмент учун овоз берган бўлса, 197таси бунга қарши бўлди. Шу билан бирга, республикачиларнинг 10 нафари ҳам импичментни қўллаб-қувватлади.
«У кетиши керак. У ҳаммамиз яхши кўрган миллат учун аниқ ва реал хавф туғдиради», — деди Вакиллар палатаси спикери Ненси Пелоси.
Энди ҳужжат Сенатга тақдим этилади. Трампга импичмент эълон қилиш учун резолюцияни сенаторларнинг учдан икки қисми, яъни 67 нафари қўллаб-қувватлаши керак.
Bloomberg нашрининг таъкидлашича , Сенат Жо Байден инаугурациясига қадар импичментни кўриб чиқмаслиги мумкин. Республикачиларнинг Сенатдаги етакчиси Митч Макконнел навбатдан ташқари йиғилишни чақиришдан бош тортди. Сенат 19 январгача таътилда.
Бироқ, демократлар президент алмашгандан кейин импичментни кўриб чиқиш чораларини кўрмоқдалар. Буни улар Дональд Трамп бундан кейин сайловларда қатнаша олмаслиги учун қилишмоқчилигини айтишмоқда.
Доналд Трамп Вакиллар палатаси томонидан икки маротаба импичмент эълон қилинган АҚШнинг биринчи президенти бўлди.
Вакиллар палатаси биринчи марта 2019 йил декабрида Трампни лавозимини суистеъмол қилишда ва Украина ҳукуматига босим ўтказган можаро туфайли Конгрессга тўсқинлик қилишда айблаб, унга импичмент эълон қилишган эди. Республикачилар раҳбарлигидаги Сенат Трампни 2020 йил февралида оқлади ва у ўз лавозимини сақлаб қолди.
Импичмент бўйича овоз беришдан сўнг, Доналд Трамп видеомурожаат билан 6 январь куни Капитолийга бостириб кирилишини қоралади ва ўз тарафдорларини «яқин кунларда Вашингтонда ҳам, бутун мамлакат бўйлаб» зўравонлик такрорланишининг олдини олишга чақирди. Видео мурожаат Оқ уй томонидан Twitter ва You Tubeда жойлаштирилган. Ушбу платформаларда Трампнинг саҳифалари блоклаб қўйилган.
