«Оскар» мукофотига номзод сифатида танланган «Фариданинг икки минг қўшиғи» фильми белгиланган вақтда тақдим этилмагани сабабли иштирокчилар рўйхатидан чиқарилди. Бу ҳақда фильм продюсери Дониёр Агзамов «Халқ сўзи»га маълум қилди.
«Йўқ қатнашмайди. Биз Ёлқин Тўйчиев бошчилигидаги жамоа қўлимиздан келган барча ҳаракатни қилдик. Биз шу вақтгача Ўзбекистон „Оскар“ қўмитасига ишониб келган эдик, мен барча нарсани 28 ноябрь куни уларнинг қўлига тутқазганман, менда барча ёзишмалар, фактлар турибди. Шу кунгача „юбордингларми“ деб сўраганимизда „ҳа юбордик“ дея жавоб бериб келишган. Декабрь ойининг бошида фильмни Америкага ҳам жўнатганман, 50 та ДВДП, битта катта терабайтли ҳардда ДСП форматда, „Surround“ форматида юборилган», — деди продюссер.
Унинг қайд этишича, «Оскар» танлови ташкилотчилари ҳам видеони сўраб Ўзбекистон «Оскар» қўмитасига 3−4 марта ёзишган, қўмита эса жавоб ҳам бермаган. «Оскар қўмитасининг қўлида фильмнинг ҳамма форматдаги нусхаси турибди, нима сўрашган бўлса қилиб берганман. Тайёр нарсани юборишмаган, охирги вақтларда телефонларимга ҳам жавоб бермай қўйишганди», — деди у.
Дониёр Агзамов 5 январь куни электрон почтасига танлов ташкилотчиларидан хат келгани ва соат 5 гача охирги муддат берилганини маълум қилди. «Биз шокка тушиб қолдик, қўмитадагиларни роса қидирдим, телефонларига жавоб беришмади. Улгура олмасдик чунки компьютер «загрузка»ни ўзига 16 соатдан 24 соатгача вақт сўради», — деди продюсер.
Дониёр Агзамов 28 ноябрь куни фильмни етказганини, уларнинг қўлига сўраган форматда берганини ва фильм қабул қилиб олинганлиги ҳақидаги ҳужжатларга эга эканини маълум қилди. Бундан ташқари, божхонадан ҳам руҳсат олганини ва тўловлар амалга оширилганини айтиб ўтди.
«Оскар қўмитаси бизга фильмни жўнатиш учун «доступ» бермаган, бўлмаса ўзимиз аллақачон жўнатган бўлардик. Ташкилотчилар 5 январь куни ҳат жўнатишди менга, агар у аввалроқ келганида эди, мен Оскар қўмитадан «доступ» сўрардим, ўзим юборардим. «Доступ» қўмитада, ўзимиз жўнатмоқчи бўлсак у бизни блоклайди. Ҳаттоки «Олтин глобус»да ҳам шунақа муаммо бўлди, сал қолди у танловдан ҳам қолиб кетардик. Ташкилотчилар қўмитадан фильмни юборишни сўраган, улар эса юбормаган, аксинча бизни ҳам блоклаган. Ўзимиз ташкилотчиларга чиқиб «доступ»ни сўраб олдик, ўзимиз жўнатдик. Ўзи Оскар қўмитаси нима билан шуғулланишини мен тушунмаяпман. Улар ўзбек киносини ривожи учун ишлаяптими ёки борини ҳам йўқ қилиш учунми?» — дея қўшимча қилди продюсер.
«Ўзбеккино» муносабати
«Ўзбеккино» Миллий агентлиги матбуот котиби Нозим Сафаров «Газета.uz»га ушбу ҳолат юзасидан агентликнинг расмий муносабатини билдирди.
«Авваламбор „Фариданинг икки минг қўшиғи“ фильми Оскар мукофоти саралаш босқичида қатнашмайди дейиш тўғри эмас. Оскар қўмитаси котиби Ойбек Абдушукоровнинг агентликка маълум қилишича Қўмита мукофот ташкилотчилари билан фильмни талаб этиладиган шаклда тақдим этиш бўйича келишмоқда. Фильм қабул қилиниши ҳам мумкин», — деди у.
«Ўз навбатида „Ўзбеккино“ Миллий агентлиги Ёлқин Тўйчиевнинг „Фариданинг икки минг қўшиғи“ фильмини Оскар талабларига мослаштириш, таржима ва субтитрлар учун қўшимча маблағ тўлаб берганлигини айтиш лозим. Шунингдек, агентлик Ўзбекистон Оскар қўмитасининг фильмларни саралаш жараёни ва ғолибни аниқлаш маросимини ўтказиш учун барча шароитларни яратиб, кўмак берган. Фильмнинг Оскар мукофоти саралаш босқичига қабул қилиниши бўйича ҳам ҳозирда кўмак берилмоқда», — дея таъкидлади агентлик матбуот котиби.
Эслатиб ўтамиз, Ўзбекистон Оскар қўмитаси томонидан нуфузли Оскар мукофотининг «Энг яхши халқаро бадиий фильм» номинациясига «Ўзбеккино» Миллий агентлиги буюртмасига биноан суратга олинган Ёлқин Тўйчиевнинг «Фариданинг икки минг қўшиғи» фильми танланган эди.
