Амалдаги АҚШ президенти Дональд Трамп ўз штаби президент сайловлари натижаларининг қайта кўриб чиқилиши учун барча қонуний имкониятлардан фойдаланганлигини, аммо энди муроса вақти келганини таъкидлади.

У ҳокимиятни сайланган президент Жо Байден маъмуриятига сокин ўтишини таъминлашга ваъда берди. «Биз жадал сайловлардан ўтдик ва эҳтирослар жуда юқори бўлди. Бироқ энди ҳовурдан тушиб, тинчликни тиклаш лозим», — деди Трамп ўз мурожаатида.

Бундан ташқари, Дональд Трамп Конгресс биносига бостириб кирилганлигини қоралади. У босқинчилар «Америка демократияси тахтини таҳқирлашганини» ва айбдорлар қонун олдида жавоб беришини таъкидлади. «Барча америкаликлар сингари мен ҳам зўравонлик, қонунсизлик ва уюштирилган даҳшатдан ғазабдаман», — деди президент.

Трамп ўзининг «ажойиб» тарафдорларига ҳам мурожаат қилиб, уларга барчаси энди бошланаётганини айтди.