Инновацион ривожланиш вазири Иброҳим Абдураҳмонов «Дарё»га берган интервьюсида 18 декабрдан 6 январгача вакцина синовида кўнгилли сифатида иштирок этиш истагини билдирган 3 минг нафар фуқаро кўрикдан ўтказилганини маълум қилди.
Кўнгиллилар мурожаатининг биринчи куни тиббий кўрикдан ўтиб, коронавирусга тест беради ва уларда антитаналар текширилади. Иккинчи куни эса улар эмланади.
Вазирнинг айтишича, қон таҳлили топширганлардан тахминан 30 фоизининг организмида коронавирусга қарши антитаналар борлиги аниқланмоқда. Улар коронавирусни ўзи билмаган ҳолда, аломатларсиз ўтказган. Ушбу кўнгиллилар эмланмайди, чунки бу вакцина самарасини текширишга ҳалақит қилиши мумкин.
Тиббий кўрикдан ўтиб, вакцина олишга лойиқ, деб топилганларга яна бир бор қайта ўйлаб кўришлари учун бир кун имконият беряпмиз — ҳеч ким уларни эмланишга мажбур қилмайди. Ҳозиргача 10 фоиз кўнгилли иккиланган ҳолда эмланишдан воз кечди.
7 январь ҳолатига кўра, синовда иштирок этаётган фуқаролар сони 1328 кишини ташкил этмоқда. Вазирнинг айтишича «ҳеч бирида шубҳали касалликлари йўқ» кўнгиллилар «ўз хоҳиш ва розиликлари билан, тадқиқот шартномасига имзо қўйиб», эмланган.
