7 январь куни АОКА бўлиб ўтган матбуот анжуманида Коррупцияга қарши курашиш агентлиги директори ўринбосари Умида Тўхташева даромадлар декларацияси тўғрисидаги қонун лойиҳаси ишлаб чиқилганини маълум қилди. 67 studio эълон қилган видеода агентлик вакили ҳозирда лойиҳа тегишли органлар билан келишиш жараёнида эканлигини ҳам таъкидлаб ўтган.
Агентлик масъул ходими Ўткирбек Номозбоев эса декларацияни қайси даражадаги мансабдор шахслар тўлдиришига ойдинлик киритди.
«Агентлик томонидан ишлаб чиқилган қонун лойиҳасида мансабдор шахсларнинг барча доираси қамраб олинган. Вазирлар Маҳкамаси, президент администрацияси, ҳокимиятлар, республика ташкилотлари, суд, прокуратура идоралари, буларнинг барчаси биз берган лойиҳада декларация қилиши акс эттирилган. Президент, бош вазир, қуйидан тортиб, юқоригача бўлган барча мансабдор шахслар назарда тутилган», — деди Номозбоев.
Агентлик директори ўринбосари Умида Тўхташева эса қонун лойиҳаси 2021 йилда қабул қилиниши кутилаётгани, тегишли ташкилотлар хулосалари олингандан кейин жараён тезлашиши, лекин ҳозирги босқичда аниқ муддатини айтиш мушкуллигини қўшимча қилди.
