Андижон вилояти Жалақудуқ туманидаги «Деҳқон бозори» ёнида қоидабузар машиналарни расмга олгани айтилган фуқаронинг самосуд қилингани акс этган видео тарқалган эди. Видеода фуқаро «Spark»нинг юкхонасига жойлаштирилиб, турли ҳақоратли сўзлар билан ҳақоратланиб, унинг уяли телефони олиб қўйилганлиги акс этган. Унинг юз атрофида майда жароҳат борлигини кўриш мумкин.

Андижон вилояти ИИБ ахборот хизматининг хабарига кўра, ҳодиса 22 декабрда рўй берган. Фуқаро Н.Қ. бозорга мевалар нархини билиш учун келган ва бозорни суратга олаётганида бир неча киши томонидан бошқа мақсадда суратга олаётганликда гумонланиб, ҳақоратланган.

Ҳолат юзасидан 5 нафар фуқаро жамоат жойида турли ҳақоратли сўзлар билан бақир-чақир қилганликда айбланиб, ҳужжатлар 25 декабрда судда кўриб чиқилган.

Ҳуқуқбузарларнинг ҳар бирига БҲМнинг 3 баравари миқдорида жарима жазоси белгиланган.