«Ҳозирда Ҳиндистонда 3 та вакцина устида иш борилмоқда. Биринчи вакцина Ҳиндистон тиббий тадқиқотлар кенгаши бошчилигида Bharat Biotech компанияси томонидан, иккинчи вакцина Serum институти томонидан, учинчиси эса Zydus Cadila компанияси томонидан ишлаб чиқилган», — дея маълум қилди Ҳиндистоннинг Ўзбекистондаги элчиси Маниш Прабхат «Ўзбекистон 24» га берган интервьюсида.
Биринчи вакцина айни пайтда учинчи босқич синов жараёнларидан ўтказилмоқда. Қолган икки вакцина эса иккинчи босқичда синовдан ўтаётганлиги маълум қилинди.
«Ҳиндистонда ишлаб чиқарилаётган вакцина компаниялари билан Ўзбекистон видеоконференция учрашувларини олиб бормоқда. Бизга шу йўналишда вакциналарни хавфсиз ва безарар маҳсулотларни ҳалқимизга етказиб бериш вазифаси қўйилган», — деди Фармацевтика тармоғини ривожлантириш агентлиги директори ўринбосари Алишер Темиров.
Эслатиб ўтамиз, 7 ноябрь куни Тошкентга Хитой вакцинаси олиб келинган эди.
4 декабрь куни Россия Федерацияси саноат ва савдо вазири Денис Мантуров Тошкентга коронавирусга қарши «Спутник V» вакцинаси намуналарини шахсан етказиб берди.
