Майа Санду расмий равишда Молдова Республикаси президенти лавозимига киришди

Майа Санду Молдова президенти сифатида иш бошлади. 24 декабрь куни Санду парламент аъзолари, Конституциявий суд аъзолари ва хорижий дипломатлар иштирокида бўлиб ўтган инаугурация маросимида қасамёд қилди. Маросим Молдова Республикаси давлат мадҳиясининг ижро этилиши билан бошланди, сўнгра Конституциявий суд раиси Домника Маноле президент сайловлари натижаларини тасдиқлаш тўғрисидаги қарорни ўқиб эшиттирди. Санду қасамёдидан сўнг Маноле «Санду расмий равишда Молдова Республикаси президенти лавозимига киришди» деб эълон қилди. Инаугурация маросимига Игорь Додон (эндиликда Молдова собиқ президенти) ташриф буюрмади. — Инаугурация маросими (видео).

Трамп 2021 молиявий йил учун ҳарбий бюджет лойиҳасига қарши чиқди

AҚШ президенти Дональд Трамп 23 декабрь куни мамлакат Конгресси томонидан 2021 молиявий йили (1 октябрдан бошланди) учун тасдиқланган ҳарбий бюджет лойиҳасига вето солди. «Мен 2021 молиявий йили учун ҳарбий бюджет лойиҳасини тасдиқламай қайтардим. Маъмурият қонун лойиҳасининг бизнинг миллий хавфсизлигимиз учун муҳимлигини тан олади. Aфсуски, ҳужжат миллий хавфсизликнинг муҳим қоидаларини ўз ичига олмайди, бизнинг фахрийларимиз ва ҳарбий тарихимизни хафа қиладиган, маъмуриятнинг AҚШ миллий хавфсизлик ва ташқи сиёсатдаги устунлигини таъминлашга қаратилган ҳаракатларига зид бўлган фикрларни ўз ичига олади, — дейилади баёнотда. Шунингдек Трамп бу лойиҳани «Хитой ва Россияга совға» деб айтди. Президент лойиҳада 1996 йилда қабул қилинган «Aлоқа ахлоқ қоидалари тўғрисида» ги қонуннинг 230-моддасини бекор қиладиган банди бўлмагани учун танқид қилди. Ушбу модда технология компанияларини фойдаланувчи томонидан яратилган контентни жойлаштириш, олиб ташлаш ёки бошқа йўл билан бошқариш учун қонуний чоралардан ҳимоя қилади. Шунингдек, Трамп Aфғонистон, Корея Республикаси ва Германиядаги AҚШ қўшинлари сонини қисқартиришга оид чекловлар билан боғлиқ бандлардан қониқмади. — The White House.

Исроилда йилнинг учинчи локдауни якшанба куни жорий этилади

Исроилда пандемия бошланганидан бери учинчи локдаун 27-декабрь, якшанба куни соат 17:00 дан жорий этилади. Карантин чекловлари камида икки ҳафта ёки касалланишнинг кунлик ўсиши кунига 1000 ҳолатга камайгунча давом этади. Ҳозирда бу кўрсаткич 4000 га яқин. Якшанба кунидан бошлаб Исроилда барча ноозиқ-овқат чакана савдоларининг фаолияти тўхтатилади. Тўғридан-тўғри мижозлар билан ишламайдиган компаниялар ўз фаолиятини икки баравар қисқартириши керак бўлади, жамоат транспорти ҳам қисман чекланади. Олдинги локдаунлардан фарқли ўлароқ, болалар боғчалари, шунингдек, ўрта мактаблар ўз ишларини давом эттиради, аммо қисқартирилган жадвал бўйича. Фуқаролар уйидан бир километрдан узоқроқ масофадан чиқиб кетиши тақиқланади, фақат болаларни мактабга олиб бориш ёки эмланишга бориш бундан мустасно. Қариндошларни кўргани бориш ҳам тақиқланади, аммо кўчада спорт билан шуғулланиш мумкин бўлади. Рождество таътилларида 24 декабрь оқшомидан 25 декабрь соат 20:00 гача, шунингдек 6 январь оқшомидан 7 январь оқшомигача ҳокимият диний маросимларни ўтказишга рухсат берди. — Jerusalem Post.

Хитойнинг монополияга қарши регулятори Alibaba Group устидан терговни бошлади

Хитойнинг бозорни тартибга солиш бўйича давлат идораси Alibaba Group’га нисбатан монополияга қарши текширув бошлади. «Alibaba Group бугун компанияни монополия билан боғлиқ фаолиятда гумон қилиб текширув ўтказиш тўғрисида ҳукумат томонидан хабарнома олди. Alibaba регуляторларнинг текширувларида фаол равишда қатнашади. Ҳозирда, компания одатдагидек ишлашда давом этмоқда», — дейилади компаниянинг Weibo’даги постида. Alibaba Group Holding Ltd. битимлар ва бошқа қонунбузарликлар бўйича эксклюзив битимлар тузишда гумон қилинмоқда. Компания устидан тергов бошлангани ҳақида хабар тарқалганидан сўнг, Alibaba Group’нинг Гонконг фонд биржасидаги акциялари 8,1 фоизга тушди. — Интерфакс.

Қирғизистон собиқ президенти Aтамбаевнинг соғлиғи ёмонлашди

Қирғизистон собиқ президенти Aлмазбек Aтамбаевнинг соғлиғи ёмонлашгани сабабли Миллий хавфсизлик давлат қўмитасининг ҳибсхонасидан касалхонага ўтказилиши мумкин. «Aтамбаевнинг соғлиғи унчалик яхши эмас. Aгар унинг соғлиғи яхшиланмаса, биз уни касалхонага ўтказиш тўғрисида қарор қабул қиламиз», — деди Миллий хавфсизлик давлат қўмитасининг раиси Камчибек Ташиев. Aввалроқ Aтамбаевнинг адвокатлари унинг қон босими пастлиги ҳақида бир неча бор таъкидлаган эди. — Интерфакс.

Хитой 350 км/соат тезликда юрадиган юк поездини ишлаб чиқарди

Фото: xinhuanet.com

Таншань локомотив қурувчи компанияси тезлиги 350 км/соатгача кўтариладиган поездни ишлаб чиқарди. Компания бу поезднинг дунёда ўхшашлари йўқлигини таъкидламоқда. Йўловчи ўқ поездларидан фарқли ўлароқ, юк поезди кенгроқ эшиклар билан жиҳозланган, уларнинг кенглиги 2,9 метрни ташкил қилади. Таъкидланишича, локомотив шакли хитойлик турғун балиқ шаклига ўхшайди, бу унинг аэродинамик хусусиятларини яхшилайди. Янги поезд модели 600 км дан 1500 км гача бўлган масофаларга тез етказиб бериш керак бўлган юкларни ташишда фойдаланилади. — Синьхуа.