Инновацион ривожланиш вазири Иброҳим Абдураҳмоновнинг айтишича, ҳозирда Тошкент шаҳридаги учта поликлиникада вакцинанинг учинчи босқич синовлари бўлиб ўтмоқда.
«Учинчи босқич синовларининг бошида вазирлик раҳбарияти, шахсан ўзим мана шу вакциналарни бир ой олдин эмлаш жараёнини амалга оширдик. Бир ой ичида бирорта ножўя таъсирини ўзимизда сезганимиз йўқ. Дастлабки натижалар антитаначаларнинг ҳосил бўлаётганлигини кўрсатяпти».
Санитария-эпидемиологик осойишталик ва жамоат саломатлиги хизмати бошлиқ ўринбосари Ботиржон Қурбоновнинг маълум қилишича, 22 декабрь ҳолатига кўра, 226 нафар кўнгилли коронавирусга қарши вакцина билан эмланган. Айни пайтда Тошкентда назоратга олиш имкони кенг бўлганлиги учун асосан пойтахтда яшовчи кўнгиллилар ушбу вакцина билан эмланаётганлиги айтилди.
«Шу пайтгача учинчи фаза клиник-синовлари давомида эмланганлар ўртасида ҳам салбий асоратлар аниқланмаган. Улар доимий равишда шифокорлар назоратида бўлиб турибди», — деди у.
Хабарда айтилишича, вакцина тўғрисидаги фикр-мулоҳазаларни билдириш ҳамда кўнгилли сифатида эмлашда қатнашиш ниятида мурожаат қилиши учун Инновацион ривожланиш вазирлиги томонидан махсус сайт яратилмоқда.
Ўзбекистонда Хитойда ишлаб чиқарилган вакциналар синови 10 декабрь куни бошланган эди. Клиник синовларни ўтказиш учун жами 5 минг нафар кўнгиллилар танлаб олинган.
