Тошкент ҳокими Жаҳонгир Ортиқхўжаев 2021 йил якунига қадар пойтахтдаги барча бузилган кўчмас мулклар учун компенсациялар тўлиқ тўлаб берилишини маълум қилди. Бу ҳақда ҳоким шанба куни ўтказилган матбуот анжуманида маълум қилди, дея хабар бермоқда «Газета.uz» мухбири.
Унинг сўзларига кўра, бу йили ҳокимият 2005 йилдан бузилган кўчмас мулклар эгаларига пул тўлаб берган.
«Ўзбекистон тарихида бир йилда бунча компенсация тўлаб берилмаган… Бу йил жуда катта миқдорда — 700−800 млрд сўм пул ва ер кўринишида «снос»га (компенсация тўлашга) кетди. Бизнинг ҳисобларимиз бор, олдимизга қўйган мақсад 2021 йилда 2005 йилдан бузилган бинолар учун ҳеч ким тўловсиз қолмайди. Лекин, адолатли, суднинг қарори бўлса, нархлар тафовути тўғри бўлган бўлса, бирортаси қолмайди. Пул бера олмасак, ер кўринишида берамиз, ер бера олмасак, бошқа йўл билан тўлаб берамиз», — дея таъкидлади шаҳар ҳокими.
Унинг айтишича, ҳозирда давлат эҳтиёжлари учун мулкни бузишдан олдин биринчи навбатда белгиланган компенсация тўлаб берилмоқда.
«Агар бундан кейин давлат эҳтиёжлари учун (кўчмас мулк — таҳр.) бузиладиган бўлса, керакли компенсация учун қўлимизда пулимиз ёки еримиз бўлгандан кейин эгасининг розилиги билан бузишга қарор қиламиз. Олдингидагидек ишлар қилмасликка биз ҳаракат қиламиз ва олдимизга шуни принципиал мақсад қилиб қўйдик», — деди Ортиқхўжаев.
Хокимиятлар компенсация тўловларини молиялаштириш манбаини аниқламай туриб уй-жой ва бошқа объектларни бузиб ташлагани учун бир неча бор танқид остига олинган эди.
Яқинда молия вазири ўринбосари Ахадбек Ҳайдаров билан учрашувда Қонунчилик палатаси депутати Расул Кушербаев нима учун 2021 йилги давлат бюджети лойиҳасида Вазирлар Маҳкамасининг давлат ва жамият эҳтиёжлари учун ер участкаларининг олиб қўйилиши муносабати билан жисмоний ва юридик шахсларга етказилган зарарларни қоплаш бўйича марказлаштирилган жамғармасига атиги 150 млрд сўм ажратилиши белгилангани ҳақида савол билан мурожаат қилган эди.
«Бу сумма қаердан келиб чиқди? Сабаби амалдаги реал эҳтиёжга қараганда жуда ҳам кам сумма қўйилган. Масалан, Тошкент вилоятининг битта туманининг ўзида биламан, 100 млрд атрофида қарздорлик бор. Ҳалигача қоплаб берилмаган. Жойини бузишга бузиб ташлаб, ҳали ҳам, мана, ётибди. На бу жойини ишлата олади, тадбиркорлик ҳам тўхтаб қолган. Бу ердаги рақам республика бўйича иккита ёки учта туманни қоплайди. Ҳокимиятлар билан қанчадан бери бахслашамиз, „бюджетда пулимиз йўқ“, деяпти, лекин жойини бузиб бўлган. Лекин жойини бузиб бўлган», — деди Расул Кушербаев.
Молия вазири ўринбосари 2020 йилнинг январь ойидан бошлаб ер участкаларини олиб қўйишнинг янги тартиби кучга киргани, унга кўра, келишилган товон пули тўланмасдан кўчмас мулкни бузишга йўл қўйилмаслигини эслатиб ўтган эди.
