The Economist нашри Африканинг жанубида жойлашган Малави давлатини йил давлати деб эълон қилди. Бу қарорни нашр «авторитар ҳудудда демократиянинг тикланиши» учун дея изоҳлади.
Хабар берилишича, коронавирус пандемияси даврида ўнлаб мамлакатларда демократия ва инсон ҳуқуқларига бўлган ҳурмат анча пасайган. Малави эса бу борада вазият яхшиланган ягона давлатга айланди.
2019 йил баҳорида Малавида бўлиб ўтган сайловларда президент Питер Мутарика иккинчи муддатга сайланди. Бироқ кейинчалик овозларни ҳисоблаш жараёни қалбакилаштирилгани аниқ бўлган эди. Шундан сўнг Малавида оммавий норозиликлар бошланиб, конституцион суд сайлов натижаларини бекор қилган. Такроран ўтказилган сайловларда собиқ президент мағлуб бўлган ва муҳолифат номзоди Лазарус Чаквер ғалаба қозонган.
«Малави ҳалигача қашшоқ, лекин у ерда яшовчи одамлар — фуқаро, қул эмас», — дея ёзган The Economist.
Ушбу номга сазовор бўлиш учун рўйхатда Янги Зеландия (COVID-19 га қарши олиб борилган самарали кураш учун), Тайван (COVID-19 га қарши олиб борилган самарали чоралар, юқори иқтисодий кўрсаткичлар ва Хитой сиёсатига қарши тура олганлик учун), АҚШ (қисқа муддат ичида COVID-19 га қарши вакцина ўйлаб топганлиги, Дональд Трампни иккинчи муддатга сайлашдан бош тортган сайловчилари учун) ва Боливия (социалист президентнинг вазифасидан озод этилиб, технократ президент Луис Арсени танлаганликлари учун) каби давлатлар бўлган.
Эслатиб ўтамиз, The Economist 2019 йилда Ўзбекистонни йил давлати деб эълон қилган эди.
